Израилдин аскерлеринин бир бөлүгүн Газа секторунан алып чыгуу тууралуу чечими бул анклавдын түндүгүндө согуштук аракеттерин азайтууга өткөнүнөн кабар бериши ыктымал. Бул тууралуу бүгүн 2-январда америкалык администрация өкүлдөрүнө таянып Reuters агенттиги билдирди.
1-январда Израил Газанын айрым райондорунан танктарын чыгарып кеткен. Бирок, жергиликтүү тургундардын маалымдашынча, башка райондордо бомбалоо, атышуу уланууда.
АКШ президенти Жо Байден вице-президент Камала Харрис менен телефон аркылуу сүйлөшүп, Жакынкы Чыгыштагы соңку окуяларды талкуулады.
«Түндүктөгү операция азая баштаганы байкалууда. Муну биз колдойбуз», — деген өкүл соңку өзгөрүү израилдик жоокерлердин ХАМАСтын (АКШда жана Евробиримдикте террордук уюм деп таанылган) аскердик потенциалык жок кылуудагы ийгилигинен кабар берерин, бирок түштүктөгү тактика өзгөрүүсүз турганын белгиледи.
23-декабрда Байден Израилдин премьер-министри Биньямин Нетаньяху менен Газа секторундагы аскердик операцияны талкуулап, жай тургундарды коргоо жана ХАМАСтын барымтасында тургандарды бошотуу зарылчылыгын айткан.
АКШ Израилдин башкы союздашы катары бул өлкөнү колдоп, бирок ошол эле учурда Газада курчуп бараткан гуманитардык кризиске, жай тургундардын каза болуп жатышына байланыштуу камтамасын билдирип келет.
Буга чейин Кошмо Штаттардын расмий адамдары Израилди Газадагы аскердик операциясын басаңдатууга, бутага ХАМАСтын жетекчилигин жана инфраструктурасын гана алууга чакырган.
Израилдик аскерлердин айтымында, согуштун жаңы фазасы бир нече айга созулушу ыктымал жана «тазалоо» локалдуу негизде уланат, Газадан чыгарылган аскерлер түндүк тараптагы Иран колдогон ливандык «Хезболла» радикал тобуна каршы күрөштү күчөтүүгө шарт түзөт.
Газадагы азыркы согуштун тутанышына былтыр 7-октябрда ХАМАСтын Израилдин айрым шаарларына кол салуусу себеп болгон. Израил ХАМАСтын бул кол салуусунан 1 200 киши набыт болгонун, 240 чакты киши барымтага алынганын, Газа тилкесинде жер операциясы башталгандан бери 170тей аскери окко учканын билдирүүдө.
Газадагы Саламаттыкты сактоо министрлигинин маалыматына караганда, жөөт армиясынын аскердик операциясынан жалпысынан 21 978 адамдын, негизинен аялдардын жана балдардын өмүрү кыйылды, дагы 2,3 миллиондой адам үй-жайын таштап качууга мажбур болду.
Октябрдан бери ХАМАС (АКШ менен Евробиримдикте террордук деп таанылган) уюмуна каршы согуштук операция жүргүзүп жаткан Израил аймактан бир нече миң аскерин чыгарып кетет. Бул тууралуу Израилдин аскер жетекчилиги 1-январда маалымдады.
Маалыматка ылайык, жакынкы бир нече жумада Израилдин беш бригадасы Газадан чыгарылат. ХАМАСтын Израилге кол салуусунан кийин аскерге чакырылып, резервде тургандардын да бир бөлүгү үйлөрүнө жиберилет.
ЦАХАЛ ошол эле учурда Израилдин ХАМАСка каршы согушунун максаты өзгөрбөй турганын, радикал топтун тилкедеги көзөмөлү жок кылынарын билдирүүдө.
"Бул максатка жетүү узак согушууну талап кылат, биз буга даярбыз" , – деди ЦАХАЛдын маалымат катчысы Даниэл Хагари.
Газадагы аскерлердин бир бөлүгү түндүк тарапка - Ливан менен чек арага жиберилиши ыктымал. Ал жакта израилдик аскерлер менен "Хезболла" радикал тобунун согушчандары менен атышуу уланып келет.
Израилдин маалымат каражаттары жакынкы арада ЦАХАЛ Газа тилкесинин түштүгүндө - Хан-Юнис шаарында операциясын күчөтөрүн жазышты.
ХАМАС (АКШ менен Евробиримдикте террордук деп таанылган) уюму көзөмөлдөгөн Газа тилкесинин саламаттык сактоо мекемеси маалымдагандай, жекшембиде жөөт армиясынын соккуларынан кеминде 35 кишинин өмүрү кыйылды.
ЦАХАЛ тараткан билдирүүгө ылайык, аскердик аракеттер анклавдагы экинчи чоң шаар деп саналган Хан-Юнисте жүргүзүлгөн. Жергиликтүү тургундар аймактын борбордук бөлүгү да бомбаланганын айтышканын AP агенттиги жазды.
Буга чейин Израилдин өкмөт башчысы эл аралык коомчулуктун ок атышууну токтотуу чакырыктарына карабай, согуш дагы “бир топ айга созуларын” айткан.
Биньямин Нетаньяху ошондой эле Газанын Египет менен чектешкен тилкесин израилдик армия өз көзөмөлүнө алууга мажбур экенин кошумчалаган.
Газаны тышкы дүйнө менен байланыштырган жападан-жалгыз маршрут Египет менен чек арадагы Рафах шаары. Ал жер азыр бул анклавдын кан төгүлүп жаткан башка бөлүктөрүнөн качып барган жай тургундарга жык толуп турат. Гуманитардык каатчылык жаралып, чатырларга батпаган качкындардын көбүнүн күнү көчөдө өтүүдө.
Газадагы Саламаттыкты сактоо министрлигинин маалыматына караганда, жөөт армиясынын аскердик операциясынан жалпысынан 21 800 адамдын, негизинен аялдардын жана балдардын өмүрү кыйылды, дагы 2,3 миллиондой адам үй-жайын таштап качууга мажбур болду.
Израил ХАМАСтын 7-октябрдагы кол салуусунан 1 200 киши набыт болгонун, 240 чакты киши барымтага алынганын, Газа тилкесинда операция башталгандан бери 170тей аскери окко учканын билдирүүдө.
Израил Газа тилкесинин борбордук жана түштүк бөлүгүнө чабуулун улантты. Бул аймакта он миңдеген палестиналык баш калкалап отурат.
Газадагы Саламаттык сактоо министрлигинин маалыматына караганда, жөөт армиясынын аскердик операциясынан соңку бир сутка ичинде 200дөй адамдын, ал эми 29-декабрга карата жалпысынан 21 320 адамдын, негизинен аялдардын жана балдардын өмүрү кыйылды.
Израил ХАМАСтын (АКШда Европа Биримдигинде террордук уюм деп таанылган) 7-октябрдагы кол салуусунан 1 200 киши набыт болгонун, 240 чакты киши барымтага алынганын, Газа тилкесинде жер операциясы башталгандан бери 169 аскери окко учканын билдирүүдө.
Бириккен Улуттар Уюмунун Адам укуктары боюнча жогорку комиссары Волкер Түрк Израилди Батыш Жээкте, анын ичинде Чыгыш Иерусалимде “палестин элине карата зомбулукту токтотуу үчүн чукул, так жана натыйжалуу кадамдарды жасоого” чакырды. 28-декабрдагы билдирүүсүндө ал аймакта адам укутары одоно бузулуп жатканы тууралуу маалыматтарга таянып Израил бийлигин коопсуздук күчтөрүнүн зомбулугун тыкыр иликтөөгө үндөдү.
«Бүгүн мен Батыш Жээкте адам укуктары боюнча абал тездик менен начарлап баратканы кенен жазылган баяндамамды жарыяладым. Израил жоокерлеринин укук тартибин коргоо максатында аскердик тактиканы, керексиз жана теңдеш эмес күчтөрдү колдонуп жатканы өтө чоң кооптонууну жаратууда”, - деди Волкер Түрк.
Израил армиясынын башчысы Герци Халеви Газа секторунда ХАМАСка каршы согуш «дагы бир нече айга созуларын», алардын үстөмдүгүнө жол берилбей турганын жана алар толук жок кылынмайынча Израилдин коопсуздугуна кепилдик жок экенин 26-декабрда айткан.