80дей өлкөнүн жана эл аралык уюмдардын өкүлдөрү Парижде Газа тилкесине берилген жардамды координациялоо маселесин талкуулап жатат. Ошол эле маалда байкоочулар согуштук аракеттерде тыныгуу жарыяланмайынча, конкреттүү кадамдарды ишке ашыруу кыйын болорун айтышат.
ХАМАС радикал тобу 7-октябрда Израилге кол салып, жүздөгөн киши каза таап, 200дөн ашууну барымтага алынгандан кийин жөөт өкмөтү жооп иретинде жоочуларга каршы согуш ачкан. Ошондон бери палестин анклавында миңдеген киши өлтүрүлдү, жараат алды жана бомбалоолордон качып жер которууга мажбур болду.
Париждеги жыйынга Палестина автономиясынын премьер-министри катышууда, Израилдин өкүлдөрү ага чакырылган эмес. Франция Израилге жыйында айтылгандар тууралуу маалымат берилип турарын билдирди.
Француз башкалаасына Египет, Иордания жана Перс булуңундагы мамлекеттер сыяктуу регионалдык оюнчулар, Батыш өлкөлөрүнүн, "Чон жыйырманын" Орусиядан тышкаркы өкүлдөрү келди. Газада иш алып барган эл аралык бейөкмөт уюмдар да катышууда.
Бирок мамлекет жана өкмөт башчылары, тышкы иштер министрлери өңдүү жогорку жетекчилердин аз келишин бейөкмөт уюмдар сындап чыгышты.
Конференцияда Газага 1,5 миллиард доллардан ашуун каражат бөлүү, гуманитардык жардам жеткирүү үчүн өткөөлдөрдү ачуу маселеси талкууланат.
Франциянын расмий өкүлү ХАМАС барымтага алган адамдары бошотуу маселеси да ортого салынарын билдирди.
Палестиналык ХАМАС тобу АКШ жана Евробиримдикте террордук деп таанылган.
Израилдин аскерлери бейшембиде эртең менен Иордан дарыясынын Батыш жээгиндеги бир нече шаарга жана качкындар лагеринде рейд жүргүздү. Рейтер агенттиги маалымдагандай, Женин лагеринде көчөлөрдү бульдозерлер менен түрттүрүштү. Жергиликтүү тургундар суу жана электр менен камсыздоо системаларына зыян келтирилгенин айтып беришти.
Палестинанын Саламаттык сактоо министрлиги Женинде жана Иордан дарыясынын батыш жээгиндеги оккупацияланган жерлерде жөөт аскерлери алты палестиналыкты өлтүргөнүн билдирди.
Израилдин армиясы – ЦАХАЛ Женинде террорчуларга каршы рейд жүргүзгөнүн бышыктады, бирок анын чоо-жайын айткан жок.
ЦАХАЛдын соккусунан Газанын түштүгүндөгү Хан Юнус шаарында эки имарат кыйрап, бир нече киши, анын ичинде балдардын каны төгүлгөнү кабарланды.
Газада бир ай мурун согуш башталганда жөөт армиясы палестиндерге түштүк тарапка чыгып кетүүнү эскерткен. Миңдеген палестиндер Хан Юнус шаарына келип баш калкалаган. Бирок Израил аскерлеринин аба чабуулдары токтой элек.
Палестиндердин Wafa агенттиги ЦАХАЛдын учактары Жабалиядагы качкындар лагерине сокку урганын, кишилер уранды алдында калганын жазган. Жөөт армиясы Жабалиядагы ХАМАСтын башкы таяныч борборунун бирин ээлегенин, 10 саат катуу кармаш менен согушкерлер колдонгон туннелдерди тапканын жарыялады.
Өзбекстандын президенти Шавкат Мирзиёев Экономикалык кызматташтык уюмуна мүчө мамлекет башчыларынын Ташкент шаарында өтүп жаткан саммитинде Жакынкы Чыгыштагы абал “глобалдуу тынчтыкка жана коопсуздукка” олуттуу коркунуч жаратып жатканын билдирип, ХАМАС куралдуу тобу менен Израилди ок атууну токтотууга, тынчтык сүйлөшүүлөрүн баштоого чакырды.
Мирзиёев "кандуу жаңжалдын курмандыктарына биринчи кезекте жайкын адамдар, өзгөчө аялдар, балдар жана карылар айланганын” белгиледи.
"Палестинанын эли өзүнүн көз карандысыз мамлекетин түзүүгө укуктуу деген бекем позициябызды кайталайбыз. Муну БУУнун резолюциялары да бышыктайт”, - деп билдирди Мирзиёев.
Шаршембиде Газа тилкесинин түндүк бөлүгүнөн гуманитардык коридор менен түштүк тарапка 50 миң киши чыгып кетти. Блу тууралуу Израил армиясынын өкүлү Даниэл Хагари 8-ноябрдын кечинде билдирди. Анын айтымында, жергиликтүү тургундар ал жакта абал коопсузураак деп эсептейт. Хагари ХАМАС Газанын түндүгүн көзөмөлдөбөй калганын кошумчалады. Бирок уюм муну четке кагууда.
БУУ Газадан шаршембиде канча киши чыгып кеткени тууралуу маалымат тарата элек. Бир күн мурда уюмдун өкүлдөрү Газа шаарын 15 миң жашоочу таштап кеткенин билдиришкен.
Жөөт армиясы – ЦAХАЛ сектордун түндүк бөлүгүн жана ал жакта орун алган Газа шаарын курчоого алгандан кийин карапайым тургундар үчүн гуманитардык коридор түзгөнүн билдирген.
ХАМАС радикал тобу БУУну элдин түштүккө эвакуацияланышына көмөктөшүүдө деп айыптады.
Улуттар Уюму өткөн ишембиде согуш башталгандан бери бир жарым миллион киши Газанын түштүк тарабына жер которгонун билдирген.
Египет менен чек арадагы Рафах пунктунан башка өлкөлөрдүн жарандарын гана өткөрүп жатышат.