Израилдин армиясы Газа тилкесиндеги Газа шаарын толук курчоого алганын билдирди. Армиянын расмий өкүлү Дэниэл Хагари аталган анклавды башкарган "ХАМАС радикалдуу тобу менен мунасага келүү жана ок атышууну токтотуу тууралуу сөз дагы болушу мүмкүн эместигин" айтты.
Ал Израил жоокерлери жердеги операцияда "аталган куралдуу топтун позицияларын жана анын командалык бекеттерин, инфраструктураларын бутага алып "террорчуларды" жок кылып жатканын" айтты.
Цахалдын маалыматына караганда, соңку бир канча сааттын ичинде ХАМАСтын 130дай өкүлү жок кылынды. Газа тилкесиндеги соңку операцияда Изралидин 20 чакты жоокери окко учту.
Мунун алдында, бейшембиде Бириккен Улуттар Уюму (БУУ) Газадагы бомбадан коргонуучу жайларга айланган төрт мектеби аткыланганын, анда бери дегенде 20 качкын мерт болгонун билдирген.
Учурда эл аралык коомчулук гуманитардык тыныгуу жарыялоого чакырып келатат. Камоолго алынган жана тынымсыз соккуларга туш болгон тилкенин тургундары азык-түлүк, күйүүчү май, таза суу, ары-дармектин тартыштыгынан жапа чегип келатат. ЮНИСЕФ бир нече күн мурун туздуу суу ичүүгө аргасыз болгон балдар ооруп жатканын эскерткен.
Газадагы 35 оорукананын 30% иштебей турат. Көбү качкындар башкалкалаган жайларга айланган. Бириккен Араб Эмираттар миң наристени дарылоону сунуш кылса, Түркия рак оорусунан жабыркаган бейтаптарды алып кетүүнү көздөөдө.
Израил шейшемби жана шаршемби күндөрү Газадагы Жабалия качкындар лагерине абадан сокку урганда ХАМАСтын эки аскердик командачысын жок кылганын билдирген.
БУУнун Адам укуктары боюнча комиссары Израилдин “пропорционалдуу эмес соккулары согуш кылмыштарына жакындашы мүмкүн” деп эскерткен.
Кошмо Штаттарында Өкүлдөр палатасы Украинаны кошпой, Израилге гана 14,5 миллиард долларлык жардам берүүнү колдоду. Сенатта көпчүлүктү түзгөн демократтар буга каршы чыгып, эки өлкөгө тең жардам берилишин талап кылып жатат.
Буга чейин президент Жо Байден эгер бул документ Конгресстин эки палатасында тең колдоо тапса вето коерун эскерткен. Сенаттын спикери Чак Шумер аны добушка койбосун айткан.
Байден Конгресстен жалпы баасы 106 млрд долларга жеткен жардам берүүнү колдоого чакырган. Анда каражаттын басымдуу бөлүгүн Украинага жумшоо, калганын Израилге, Тайванга жана Мексика менен чек араны бекемдөөгө берүү каралган.
30-октябрда Өкүлдөр палатасындагы республикачылар Израилге 14,3 млрд доллар жардам берүүнү, бул үчүн АКШнын салык кызматын каржылоону кыскартууну сунуш кылган.
Палатанын жаңы спикери Майк Жонсон адегенде Израилге жардамды бөлүүнү, Украинаны өзүнчө талкуулоону жактарын айткан. Буга чейин Трамптын тарапташы катары белгилүү мыйзам чыгаруучу Киевге кошумча жардам берүүгө каршы добуш берип келген.
Израилдин танктары жана аскерлери бейшембиде Газа шаарына карай жылды. Бирок, “Рейтерс” агенттиги жазгандай, минометторду колдонгон согушкерлердин туннелдерден кол салуусуна кабылды.
Газа тилкесинин негизги шаары Израиль аскерлеринин чабуулунун чордонунда болуп келатат. Жергиликтүү жашоочулар калаа түн бою бомбаланганын 2-ноябрда кабарчыларга айтып беришти.
Ал арада эл аралык коомчулук гуманитардык тыныгуу жарыялоого чакырып келатышат. Камоолго алынган жана тынымсыз соккуларга туш болгон тилкенин тургундары азык-түлүк, күйүүчү май, таза суу, ары-дармектин тартыштыгынан жапа чегип келатат. ЮНИСЕФ бир нече күн мурун туздуу суу ичүүгө аргасыз болгон балдар ооруп жатканын эскерткен.
Газадагы 35 оорукананын 30% иштебей турат. Көбү качкындар башкалкалаган жайларга айланган. Бириккен Араб Эмираттар миң наристени дарылоону сунуш кылса, Түркия рак оорусунан жабыркаган бейтаптарды алып кетүүнү көздөөдө.
Израил шейшемби жана шаршемби күндөрү Газадагы Жабалия качкындар лагерине абадан сокку урганда ХАМАСтын эки аскердик командачысын жок кылганын билдирген.
“Рейтерстин” маалыматына караганда, Израил радикал топ командалык борборун жана “террордук инфраструктурасын калк жашаган имараттардын айланасына жайгаштырып, элди кооптуу абалга атайлап кептеген”, - деп айтты.
БУУнун Адам укуктары боюнча комиссары Израилдин “пропорционалдуу эмес соккулары согуш кылмыштарына жакындашы мүмкүн” деген камтамасын билдирди.
Газаны башкарган ХАМАСтын басма сөз кызматы Жабалияда эки соккудан кеминде 195 палестиналык каза тапканын, 120 кишинин дайыны белгисиз болуп жатканын, 777 киши жараат алганын жазды.
Анклавды башкарган ХАМАС радикал тобу 7-октябрда Израилге кол салгандан кийин жөөт армиясы Газаны бомбалап, бир нече күн мурун жерде операция баштаган.
Газанын Саламаттык сактоо министрлиги жаңжал башталгандан бери 9 миңден ашык киши каза тапканын, 3760ы балдар, 2 миңден көбү аялдар экенин билдирди.
Израил тараптагы жоготуулар 1400 киши деп кабарланган, алардын 300 чактысы аскерлер. Дагы 200дөн ашуун киши ХАМАСтын барымтасында калууда.
АКШ президенти Жо Байден Израил менен ХАМАСтын куралдуу жаңжалында гуманитардык тыныгуу жарыялоону колдорун билдирди. Миннесота штатында элдин арасынан берилген суроого жооп кайтарып, президент: "Тыныгуу керек деп ойлойм", -деди.
"Туткунда кармалып жаткандарды чыгаруу үчүн убакыт берүүгө тыныгуу зарыл экенин" тактай кетти.
Кийинчерээк Ак Үйдүн өкүлү Байден туткундарды эмес, ХАМАС 7-октябрда кармап кеткен барымтадагы кишилерди айтканын түшүндүрдү.
Президент азыркы кырдаал израилдиктер жана мусулман дүйнөсү үчүн «өтө татаал» деп айтты.
«Мен «эки мамлекет» формуласын колдойм. Эң башынан эле колдоп келгем. ХАМАС террордук уюм, ачыктан-ачык террордук уюм», - деп билдирди АКШ лидери. Муну менен катар гуманитардык жардамдын үстүнөн иштеп жатканын, Израилдин премьери Биньямин Нетаньяхуну жана Египет президенти Фаттах ас-Сисини Газага гуманитардык жүк жеткирүүгө уруксат берүүгө көндүргөнүн белгиледи. Ошол эле маалда ал ок атышууну толук токтотууну колдогон жок.
Буга чейин Байден жана Ак үйдүн өкүлдөрү Израилге жоочуларга каршы согушту кандай жүргүзүү керектигин таңуулабасын билдиришкен.
«Свобода» радиосу жазганына караганда, америкалык президент укук коргоочулардын, дүйнө лидерлеринин жана демократтар партиясындагы либералдардын кысымына туш болууда. Алардын пикиринде, Израилдин Газаны бомбалоосу коллективдүү жазалоо болуп эсептелет жана муну токтотуу зарыл.
Анклавды башкарган ХАМАС радикал тобу 7-октябрда Израилге кол салгандан кийин жөөт армиясы Газаны камоолго алып, бомбалап, бир нече күн мурун жерде операция баштаган.
Газанын Саламаттык сактоо министрлиги жаңжал башталгандан бери 8,5 миңден ашуун киши каза тапканын, көбү балдар менен аялдар экенин билдирди.
Израил тараптагы жоготуулар 1400 киши деп кабарланган. Барымтага алынган 250дөй киши Газада кармалууда.