Баткен облусунан дайындалган башкы баяндамачы Шержан Абдыкалык уулу чек арадагы айылдардын коопсуздугуна байланыштуу бир катар сунуштарды берди. Ал жаңжал чыккан маалда ага туруштук берүү үчүн чек арага чектешпеген айылдарды резервдик курамдарды түзүүнү сунуштады.
Ошондой эле куралдуу кагылышта эл мал-мүлкүнөн, жыйнаган дүйнөсүнөн, бак-шагынан ажыраганын белгилеп, учурда турак жайлар гана кайра курулуп жатканын, мындан улам элге тийген зыяндын орду толугу менен толтуруп берилиши керектигин билдирди.
Абыдкалык уулу мамлекеттин эсебинен камсыздандыруу маселесине токтолду. Жаңжал маалында элди коопсуз жайга эвакуациялоодо жолдордун коопсуздугу каралышы керектигин эскертти.
Курултайда Нарын облусунан дайындалган баяндамачы Марат Тагаев президент Садыр Жапаровго кайрылып, бийликке сын айткан айрым жаштар камалып жатканына көңүл бурду.
"Жаштар арасында бийликке сын айтып, камалып жаткандар дагы бар. Урматтуу президент, алардын жүрөгүндөгү отуy өчүрбөй, акыныбыз Аалы Туткучов айткандай айкөлдүк кылат деп ойлойбуз. Биринчи элдик курултай деп айтканга негиз бардыр, бирок аны чыныгы элдикке айлантуу ар бирибизден көз каранды".
Президент Садыр Жапаров элдик курултайда делегаттар айткан маселелерге жооп берип жатып, Нарынга логистикалык борбор куруу маселесине токтолду. Ал бир жылдан ашык убактан бери аны салууга инвестор чыкпай жатканын маалымдады.
"Былтыр Ат-Башыга барып, эл менен жолуктум. Мен камакта жатканда бул жерге логистикалык борбор салалы десе эл ызылдап, салдырбай койгон эле. Мен кийин изилдесем, ал 100% пайдасы бизге тийген борбор экен. Ошол жерден жадагалса электромобилдерди чыгармак экенбиз. Элге түшүндүргөндөн кийин "болду, салдыр, инвестор алып кел" дешти. Бүгүнкү күнгө чейин инвестор келбей койду, "Чакырганга келбеген, ымдаганга зар болот" болдук . "Алар "элиңер иштетпейт экен, кийин банкрот болуп калам" деп келишпейт экен. Муну ошол убактагы бийлик элге туура түшүндүрүп жеткире алган эмес",-деди президент.