Элдик курултайда оппозициялык Бириккен демократиялык кыймылдын өкүлү Сапар Аргымбаев бийликке байланыштуу бир катар маселерди көтөрдү. Ал президент Садыр Жапаров убагында оппозицияда жүргөндө ага кылмыш ишин козгогон прокурорлордун, соттогон соттордун жоопкерчилиги каралбай калганын айтты. Мындан улам аларга чара көрүлүшү керектигин, бул азыр дагы буйрук аткарып жаткандарга сабак болорун белгиледи.
"Урматтуу Садыр Жапаров, сиздин жаныңызда жүргөн кошоматчыларга бир гана сөзүм бар: токтоткула! Кошоматчы болуп жүрүп канча президентти аңга түрттүңөр. Мен убагында башкы прокурор Курманкул Зулушевден сурадым эле, "Садыр Жапаровго материал токуп, аны 10 жылга камаган прокурорлорду, сотторду эмнеге жоопко тарткан жоксуңар" десем, "Садыр Жапаров арыз жазган жок" деп жооп берген. Прокуратура фактыга байланыштуу эле козгошу керек эле, бирок аны жасаган жок. Ошол прокурорлор, соттордун баарынын жоопкерчилиги каралса, болбогон жерден камалып жаткандардын баары эртең эле чыгып келет. Ошол соттор, прокурорлор аларды соттобойбуз дешет".
Сапар Аргымбаев ошондой эле "Дастан" ишканасынын мурдагы башчысы Алексей Ширшовдун мурдагы президент Курманбек Бакиевдин уулу Максимдин акчаларын Кыргызстанга кайтаруу убадасын эске салды. Мындан улам ал каражаттын тагдырына кызыкты. Аргымбаев ошондой эле, Жогорку Кеңеште Улуттук коопсуздук комитетинин төрагасы Камчыбек Ташиевдин сөгүнгөнүн белгилеп, буга тиешелүү чара көрүлбөй калганын сынга алды.
"Ширшов келгенде аны тосуп алып, башынан сылап, "ал Максимдин 200 миллион долларын" алып келип берет дешти эле. Ошол акча келдиби, келсе кайсы эсепке түштү? Ошого да жооп бергилечи. Бүгүн Ширшовдун кадрларынын баары бийликке келди. Алардын ичинде Таалай Ибраев деген болгон. Ага 2010-жылдан бери алты кылмыш иши ачылган. Ал иштер кандай жабылган, эмне болгон, мен билбейм. Кылмыш иши ачылган кишини министр кылып дайындоо суроо жаратат. Эми дагы бир нерсе, мен ал сөздү силердин алдыңардан айткандан да тартынам, бирок айтыш керек. Кечээги Жогорку Кеңеште "энеңди..." деп айтылган сөзгө кандай баа берилиши керек болчу? Ошону айтып жаткан киши президент Садыр Жапаровду көзүнө илбей туруп айтты. Болгондо дагы аны элдин трибунасында айтты", - деди Аргымбаев.
Курултайдын төрагасы Кадыр Кошалиев Аргымбаев сөзүнүн аягына чыгарганга чейин эле микрофонун өчүртүп койду.
Парламентте кыргыз-өзбек чек арасына байланыштуу макулдашуу каралып жатканда Камчыбек Ташиев менен депутат Өмүрбек Бакиров кайым айтыша кеткен жана жыйынтыгында УКМК төрагасынын сөгүнгөнү угулуп калган.
Ушул жылдын май айында Садыр Жапаров "коррупция" беренеси менен кармалып, дароо эле үй камагына чыгарылган "Дастан" Алексей Ширшов тууралуу комментарий берген. Ал Фейсбуктагы баракчасына Ширшов Максим Бакиевдин 200 миллион долларын Кыргызстанга кайтарууга көмөктөшөрүн жазган.
"Менимче, региондордун өкүлдөрүн чогулткан жыйынды “Курултай” дебей эле ”эл кеңеш” десе болмок экен. Анткени Курултайдын түп мааниси, даражасы биздин жол, суу, свет, трансформация, бала бакча, дары-дармек сыяктуу ыбырсыган турмушубузга байланышкан күндөлүк ташпиш эмес, алда канча жогору, улуттун коопсуздугу, глобалдашып аткан азыркы опуртал кырдаалдагы ордубуз, стратегиялык багытыбыз, кризистен чыгуунун жолдору, мамлекетти өнүктүрүү, татаал мезгилдин ар кыл сыноолоруна туруштук берүү сыяктуу омоктуу маселелердин тегерегинде талкуу, талаш тартыштар болушу керек эле да. Окумуштуулар, социологдор, саясий аналитиктер, экономисттер, изилдөөчүлөр элдин алдына келечекке байланышкан олуттуу маалыматтарды жарыялап, ар кыл кыйын кырдаалдардан чыгуунун жолдорун талкууга коюшу керек болчу.
Анын ордуна делегаттар президентке чурулдап арызданып, жеринде эле чечтле турган айылынын көйгөйүнөн ары чыга албай, айрымдары “тим эле” көрүнүп коюштун” аракетин кылгандай таасир калтырды. Айрымдардын мамлекеттик органдардагы коррупция тууралуу даттангандары болбосо, жалпысынан бул жыйын мурда болуп жүргөн эле чоң чогулушка окшоду".
Айбек Сарыгул:
"Чет өлкөлөрдө консулдук кызматтарды берген консулдардын санын жана айлык акысын ошол өлкөлөрдө жашаган кыргыз жарандарынын "сөз жүзүндө" гана санына жараша көбөйтпөй, консулдук каттоодо турган жарандардын санына байланыштырыш керек. АКШ менен Канадада сөздө 100 миңден көп кыргыз жараны жашашы мүмкүн, бирок алардын канчасы консулдук каттоодон өткөн? Консулдар көбүн эсе жарандарды консулдук каттоого алгысы келбейт, анткени ал иш көбүрөөк машакаттуу. Ар кандай шылтоолор бар, эң негизгиси "биз жарандарга онлайн каттоого да мүмкүнчүлук бердик, каттоону акысыз кылдык, бирок жарандар өзүлөрү каттоого турууну каалабай жатат" делет. Бирок "консулдук каттодо турган жарандардын санына жараша айлыгың да, иштеген консулдун саны да көбөйөт" десе, анда бул стимул болот, консулдар ар бир жаранга кол узатып жете алышат. Чет өлкөлөрдө орточо эсеп менен 1 миллиондон ашык кыргыз жараны туруктуу жашап жүрөт, бирок алардын ашып кетсе 15% кана консулдук каттоодо турат. Кыргызстанда деле айыл өкмөттөрүнүн саны, иштеген кызматкерлдердин саны ошол айыл өкмөттө катталган жарандардын санына жараша белгиленген, эмнеге чет өлкөдө кыргыз жарандарына мамлекеттик кызматтар сунган консулдардын саны ошол консулдукка катталган жарандардын санына байланбайт? Консулдардын берген мамлкеттик кызматтардан эффект алгыбыз келсе, сөзсүз түрдө белгилүү шарттарды коюшубуз шарт. Болбосо кээ бир өлкөлөрдө жарандарыбыз аз, бир консул 30 кишиге кызмат берет, кээ бир өлкөлөрдө бир консулга 50 миң кишиге кызмат берүүгө туура келип жатат.