Америка Кошмо Штаттарынын мамлекеттик катчысы Энтони Блинкен Эгемендиктин 30 жылдыгына карата кыргызстандыктарга кайрылуу жасады.
Ал АКШ менен Кыргызстандын ортосундагы ондогон жылдык карым-катышты, байланышты жогору баалап, мындан ары да жалпы демократиялык баалуулуктардын чегинде кызматташтык уланарына ишеничин билдирди.
"Эки өлкөнүн тыгыз байланышы эки элди эле жакындатуудан тышкары адамзаттын жалпы көйгөйү болгон климаттын өзгөрүшү, улуттар аралык уюшкан кылмыштуулук менен күрөшүү кыйынчылыктарын бирге чечүүгө өбөлгө болот. Кошмо Штаттары Кыргызстанды коронавирус менен күрөшүүдө колдоп, бул максатта 5 миллион доллардык жардам көрсөттү. Кыргызстандын эгемендигин, көз карандысыздыгын жана аймагынын бүтүндүгүн колдойбуз".
Эгемендиктин 30 жылдыгына арналган Бишкектеги "Ала-Тоо" аянтында президент Садыр Жапаров бүгүн, 31-августта сөз сүйлөдү.
Ал 2020-жылдагы оор экономикалык абал, пандемиянын кесепеттери тууралуу айтып, өзү бийликке келгенде бюджет бош болгонун айтты.
"2020-жылы пандемияга байланыштуу Кыргызстандын экономикалык өнүгүү темпи 8,6% төмөндөгөн. Азыркы учурда пандемия уланып жатат. Бирок ага карабастан 2021-жылдын жети айында экономикалык активдүүлүк акырындап калыбына келүүдө. Мен президент болуп келгенде бюджет бош, резервде бир тыйын жок эле. Бүгүнкү күнгө чейин бардык мамлекеттер менен чек ара жабык, соода-сатык жокко эсе. Мындай учурда салык менен бажы төлөмдөрүнүн кирешеси да төмөндөйт. Ошондой болсо да экономикалык оор абалды турукташтыра алдык. Эгерде Кыргызстан былтыр бюджетти жабуу үчүн 350 миллион доллар карыз алса, быйыл финансылык ресурстарды туура колдонуп, чукул иш-чараларды жүзөгө ашырып, болочок муундун келечегине эмитен кам көрүү үчүн стабилизациялык фонд түзүп жатабыз", - деди Жапаров.
Президент өлкөдө салык системасы ачык-айкын болуп, пандемияда жабыр тарткан ишкерлерди колдоо жүзөгө ашарын белгиледи.