COVID-19 алты адамдан чыкты, бирөө Казакстандын жараны
Бишкек шаарында соода борборунун вирус жуктурган бир кызматкери 48 адам менен байланышта болгон.
Ушундан улам, шаардын вице-мэри Татьяна Кузнецова шаардыктарды эл көп чогулган жерлерге барбоого, муктаждык болбосо үйдөн чыкпай турууга чакырды. Вице-мэр бул тууралуу бүгүн, 16-майда брифингде билдирди.
Ал эми саламаттык сактоо министринин орун басары Нурболот Үсөнбаевдин айтымында, коронавирус илдетине чалдыкканы аныкталган алты адамдын үчөө чет өлкөдөн жүк ташуучу автоунаа айдап келгендер экенин билдирди.
"Айдоочулар чек арадан өтүп жатканда ПЦР-тесттерин тапшырат. Андан кийин жүктү жеткирүүчү жерге чейин штабдын кызматкерлеринин коштоосунда баргандан кийин обсервацияга алынат. Бир айдоочу казак жараны болуп чыкты. Ал Кыргызстанга тактай тилчү станок жеткирип эле, кайра Казакстанга чыгып кеткен. Бирок аны чек арадан текшерүү учурунда андан вирус аныкталган. Бул маалыматты биз Казакстандын Кордой облусундагы кесиптештерибизге бергенбиз. Алар бул айдоочуну тийиштүү дарылоого ала турган болушту", - деди Үсөнбаев.
Жаңы аныкталгандардын калган үчөө коронавирус менен ооруган адамдар менен байланышта болуп, жуктуруп алган.
Алардын үчөө Бишкекте, бирөө Ош шаарында, бирөө Ош облусунда, бирөө Баткен облусунда.
Ушуну менен 16-майга карата Кыргызстанда жалпы коронавирус илдетин жуктурган 1117 учур катталды.
Нурболот Үсөнбаев акыркы суткада 38 адам оорудан айыгып чыкканын кабарлады. Жалпысынан коронавирустан 783 адам сакайды.
14 адам COVID-19 илдетин жуктуруп алгандан кийин каза тапты.
Акыркы суткада медицина кызматкерлеринен вирус аныкталган жок. Жалпысынан ооруга чалдыккан 247 медицина кызматкердин 200ү айыгып, ишине кайтты.
Ушул тапта 320 адам стационарда, төрт киши жандандыруу бөлүмүндө жатат.
Оксфорддун вакцинасы сыноодо
Оксфорд университетинин окумуштуулары иштеп чыккан коронавирустун вакцинасы алты маймылга сайылды.
“Evening Standard” гезити маалымдагандай, эмдөөнүн таасири 14 күндөн кийин байкалганын, вакцина маймылдын өпкөсүнүн клеткасын калыбына келтирип, 28 күндөн кийин антитело чыкканы менен коронавирус өзүн-өзү көбөйтүүсүн токтотпой каңылжарда жашай берери билинди. Бул илимий тажрыйба азырынча адамдарга жасала элек. Аны жетектеген Лондондун гигиена жана тропикалык медицина мектебинин профессору Стефан Ивенс тажрыйбаны “жакшы жаңылык” деп атады.
Буга чейин Британияда миңдей ыктыярчыга коронавирустун вакцинасы сайылган. АКШ, Кытайда да вакцинаны иштеп чыгуу үчүн “Moderna Inc”, “Pfizer Inc”, “BioNTech SE” жана “CanSino Biologics Inc” компаниялары сыноо жүргүзүүдө.
Тажикстанда коронавирус дагы 204 адамдан табылды, Өзбекстанда карантин узартылды
Тажикстанда 16-майда саат 17:30га карата дагы 204 кишиден коронавирус табылганын бул өлкөнүн Саламаттыкты сактоо министрлиги билдирди. Ошону менен вирус жуктургандардын жалпы саны 1322 кишиге жетти.
Акыркы бир сутка ичинде илдеттен үч киши каза тапты, өлгөндөрдүн жалпы саны 36 болду.
Жергиликтүү тургундар жана көз карандысыз эксперттер бул расмий маалымат ишенич жаратпай турганын, социалдык тармактарда жакындарын жоготкондор, туугандары оор абалда жаткандардын кабарлары, видеолору жайнап кеткенин айтышат.
Тажикстандын Саламаттык сактоо министрлиги парламенттин төмөнкү палатасынын спикери Махмадтоир Зокирзода жаңы вирустан айыгып чыкканын кабарлады.
30-апрелге чейин өлкөдө коронавирус жок деп кайталап келген тажик бийликтери коомчулуктун басымы алдында ДССУнун эксперттер тобун чакырып, мамлекеттеги эпидемиологиялык абалды иликтеп берүүнү өтүнгөн. Эл аралык адистер тобу өз байкоолорун жакынкы күндөрү жарыялары күтүлүүдө.
Тажикстанда жалпы улуттук карантин жарыяланган эмес. Апрелдин акыркы күнү алгачкы оорулуулар расмий катталгандан кийин орто мектептер августтун ортосуна чейин эс алууга жабылып, массалык иш чараларга чектөө киргизилген. Көпчүлүк мекеме, ишканалар кызматкерлерин аралыктан иштөөгө өткөрүп, катардагы тургундар өз алдынча вирустан коргонуу чараларын көрүп жатышат.
Ал эми Өзбекстанда карантин 1-июнга чейин узартылды. Бирок 15-майдан тарта айрым ишканаларга ишин жандандырууга уруксат берилгени кабарланды. Өкмөттүн атайын комиссиясынын маалыматына караганда, Өзбекстанда 2652 адам коронавирус жуктуруп алган, 11 киши илдеттен кайтыш болду.
Коңшулаш Казакстанда коомдук транспорттун жүрүү убактысы эки саатка узартылды. Нур-Султан шаарында автобустар саат 6:00-22:00 чейин жүрөт. Казакстанда өзгөчө абал 11-майдан тартып алынган, бирок эпидемиологиялык кырдаалга жараша карантин улана берет.
Казакстанда 5850 адам COVID-19 жуктуруп алган, 34 киши илдеттен көз жумган.
16-майдан 17-майга караган түнү Австрия Чехия, Венгрия жана Словакия менен чек арасын ачты.
Бул тууралуу Австриянын ички иштер министрлиги билдирди. Австриянын бийлиги мындай кадамга адамдардын, айрыкча бир өлкөнүн чек арасынан экинчисине өтүп иштегендердин кыймылын жеңилдетүү үчүн барганын билдирди.
Австриянын ички иштер министрлигинин билдирүүсүндө «Чек арада текшерүү тандоо иретинде жүргүзүлүп, ар бир айдоочу токтотулбайт» деп айтылат
Орусиядан 156 кыргызстандык кайтып келди
16-майга караган түнү Орусиянын Санкт-Петербург шаарынан чартердик учак менен 156 кыргызстандык келди. Келгендердин баары коопсуздук максатында "Манас" аэропортунун учуу тилкесинен эле текшерүүдөн өткөрүлүп, COVID-19 вирусуна ПЦР- диагностикага анализ тапшырышты. Андан кийин обсервацияга жиберилди.
Буга чейин Орусиянын Соль-Илецк шаарынан автобус менен келген 519 адамдын 56сы коронавирус жуктуруп алганы аныкталып, ооруканага жаткырылган.
Учурда Оренбург - Самара кан жолунун боюнда дагы 500дөн ашуун Кыргызстандын жараны чатырларда, машинелерде же ачык асман алдында эле түнөп жатат. Алар Орусиянын аймагынан чыгып, мекенине жетүүнү суранышууда.
16-майда Орусиянын 83 аймагында, аннексияланган Крымды кошо эсептегенде 9200 адам вирус жуктуруп алганы аныкталды. Өлкөдө жалпысынан 272 миң адам оору жуктуруп алган. 63 166 адам сакайып чыкты. 2537 адам илдеттен көз жумду.