Коронавируска каршы республикалык ыкчам штабдын 25-августтагы маалыматына караганда, бир суткада Кыргызстанда бул инфекциядан төрт адам каза болду.
Жалпысынан өлкөдө коронавирустан каза болгондордун расмий саны 2498 адамга жетти.
Соңку бир күн ичинде вирус дагы 229 адамдан табылды. Алардын эң көбү Бишкек шаарында (102) жана Чүй (46), Ысык-Көл (27) облустарында.
Өлкөдө бул оору жуккандардын расмий катталган саны 174 576 адамга жетти.
Бир күндө 444 адам айыгып, ооруканадан чыкты. Азыр ооруканада 1260 адам жатат, дагы 1794 бейтап үйдөн дарыланууда.
Коронавируска каршы ыкчам штабдын 20-августка карата берген маалыматына ылайык, Кыргызстанда 242 адам вирус жуктурганы лабораториялык жактан тастыкталды. Акыркы суткада 526 киши сакайды. Беш адам илдеттен көз жумду.
- Бишкек - 81
- Ош шаары - 8
- Чүй облусу – 71
- Ош облусу – 12
- Талас облусу - 11
- Нарын облусу - 11
- Ысык-Көл облусу – 24
- Жалал-Абад облусу – 9
- Баткен облусу - 15
Ушуну менен былтыр март айынан бери коронавируска чалдыккандардын саны 173 428 адамга жетти. Жалпы - 165 368 киши сакайды. Илдеттен 2473 адам каза болду.
Медицина кызматкерлеринин 57% эмдөөдөн өттү
Кыргызстандагы медицина кызматкерлеринин 57,5% коронавируска каршы эмдөөдөн өттү. Бул тууралуу министрликтин басма сөз кызматы билдирди.
Коронавируска каршы вакцинанын биринчи дозасын 41 300 (57,5%), экинчи дозасын 31 622 (44%) медицина кызматкери алган.
Саламаттыкты сактоо жана социалдык өнүктүрүү министрлигинде иштеген кызматкерлердин 2978и (77,6%) коронавируска каршы эмдөөдөн өткөн.
Мекемеде жалпы 3095 штаттык бирдик бар, анын 117 оруну бош.
18-август, саат 14:30гө карата Кыргызстан боюнча жалпы 910 миң адам эмдөөдөн өттү.
18-августка карата Кыргызстанда 260 адам коронавирус жуктурганы лабораториялык жактан тастыкталды. 534 адам сакайып чыкты. Беш адам көз жумду.
Ушуну менен былтыр марттан бери өлкөдө вируска чалдыккандардын жалпы саны - 172 937 адамга жетти. Оорудан сакайгандар - 164 344 киши. Илдеттен 2462 адам көз жумду.
Саламаттык сактоо жана социалдык өнүктүрүү министрлигинин кызматкерлери да эмдөөдөн өтүүдө.