Саламаттык сактоо министрлиги коронавирус менен ооруган медкызматкерлердин 147си өкмөттөн 200 миң сомдон кенемте алышканын маалымдады. Башкаларына төлөп берүү маселесин атайын комиссия карап жатат.
Кенемте алуу максатында 1901 медкызматкердин атынан арыз түшкөн.
Кыргызстанда коронавирус жуккан медицина кызматкерлеринин саны 24-октябрга карата 3569га жетти. Алардын ичинен 3251и айыгып, 84ү каза болду. Алардын арасынан 24 кишинин жакындарына миллион сомдон төлөндү.
«Эл аралык мунапыс» уюму («Amnesty International») пандемия маалында Кыргызстандагы медицина кызматкерлеринин укуктары одоно бузулганы тууралуу 25-сентябрда баяндама жарыялаган.
Коронавируска каршы республикалык штабдын 24-октябрдагы маалыматына ылайык, өлкөдө бул дартка кабылгандар марттан бери 55144 кишиге жетти. Алардын 47 337си айыгып, 1130 бейтап көз жумду.
Коронавируска каршы күрөш боюнча республикалык штабдын 24-октябрдагы маалыматына караганда, акыркы бир суткада COVID-19 вирусунан жана пневмониядан дагы төрт бейтап каза болду.
Алар Бишкек шаарында, Ош, Чүй, жана Баткен облустарында катталды. Ушуну менен COVID-19 илдетинен көз жумгандардын саны 1130га жетти.
Акыркы суткада 556 адамдан вирус жаңыдан табылды. Мурда ооругандардын 287си айыкты.
Оору жугузгандардын аймактардагы эсеби:
- Бишкек шаарында - 149;
- Баткен облусунда – 86;
- Жалал-Абад облусунда - 83;
- Ош облусунда - 75;
- Чүй облусунда - 67;
- Ысык-Көл облусунда – 35;
- Ош шаарында – 34;
- Талас облусунда - 23;
- Нарын облусунда - 4 киши.
Кыргызстанда марттан бери вирус жугузуп алгандардын расмий эсеби 55144 адамды түздү. Алардын арасынан 47 337 бейтап айыгып чыкты.
Статистика боюнча учурда вируска чалдыккан 3300 бейтап стационарда, калганы үй шартында дарыланып жатат.
2019-жылдын декабрында Кытайдын Ухань калаасынан чыккан вирус 188 өлкөгө тарады.
АКШдагы Жон Хопкинс университетинин маалымат базасы көрсөткөндөй, 24-октябрга карата дүйнөдө коронавирус жуккандардын саны 42 миллион 148 миңден ашты. Алардын 1 миллион 143 миңден көбү жашоо менен кош айтышты. 28 миллион 484 миңден ашуун бейтап айыкты.
АКШда оорулуулар сегиз миллиондон, Индияда жети миллиондон, Бразилия беш миллиондон ашты. Орусияда, Аргентинада, Испанияда, Францияда миллиондон көп.
Коронавирус пандемиясы башталгандан бери Кыргызстанда илдетти жуктуруп алган 84 медицина кызматкери каза болду.
Бул тууралуу Саламаттык сактоо министрлигинин басма сөз катчысы Жылдыз Айгерчинова 23-октябрда «Азаттык» радиосуна билдирди.
Арасында мамлекеттик жана жеке бейтапканаларда иштеген дарыгерлер, орто жана кичи кызматкерлер да бар.
Каза болгондордун арасынан 24 кишинин жакындарына өкмөттөн миллион сомдон кенемте төлөндү. Башкаларына төлөө жагын атайын комиссия карап жатат.
Кыргызстанда коронавирус жуктуруп алган медицина кызматкерлеринин саны 3566га жетти, алардын ичинен 3228и айыкты.
«Эл аралык мунапыс» уюму («Amnesty International») пандемия маалында Кыргызстандагы медицина кызматкерлеринин укуктары одоно бузулганы тууралуу 25-сентябрда баяндама жарыялаган.
Коронавируска каршы республикалык штабдын 23-октябрдагы маалыматына ылайык, өлкөдө бул дартка кабылгандар марттан бери 54 588 кишиге жетти. Алардын 47050сү айыгып, 1126 бейтап көз жумду.
- автор Айнура Жекше кызы
Чехияга АКШ дарыгерлери жардамга келет
Европада коронавирустун экинчи толкуну күч алууда. Акыркы 10 күндө вирусту жугузуп алгандар эки эсе көбөйдү. "Рейтер" агенттигинин маалыматына ылайык, 22-октябрда эски континентте биринчи жолу бир күндө 200 миңден ашуун киши инфекция жугузуп алганы катталды.
Европанын Илдеттердин алдын алуу жана көзөмөлдөө борбору бейшембиде жарыялаган статистикага караганда аймакта COVID-19га 5,3 миллион киши чалдыкты, каза болгондор 205 миңге жакындады.
Көпчүлүк өкмөттөр кайрадан беткап тагынып жүрүү эрежесин, бир топ жерлерде коменданттык саат киргизишти.
Ооруканалар жарым жыл мурдагы кризис учурундагыдай толуп калбаганы менен медициналык мекемелерге күч келе баштады. Адистер ооруканаларга түшкөндөрдүн көбөйүшүн абал курчуп, илдеттен көз жумгандар да көбөйөт деген коңгуроо катары кабыл алуу керектигин белгилешет.
Ошол эле маалда коронавируска каршы чара көрүү, ооруну дарылоо ыкмалары биринчи толкун келген маалдагыдан жакшырды.
Европанын эң көп жабыр тарткан өлкөсү - Чех жумурияты кайрадан жарым-жартылай карантин киргизди. Өкмөт НАТО жана Еврошаркеттен 300дөй медкызматкерди кабыл алуу планын колдоду. Түндүк альянс 60 ИВЛ аппаратын жөнөтүүнү караштырууда.
Чехияда шаршемби жана бейшемби күндөрү вирусту жугузуп алгандардын саны 15 миңдин айланасында болду.
Ал арада Чехиянын премьер-министри Андрей Бабиш карантин чараларын бузганы айтылган саламаттык сактоо министри Роман Примулага талап койду. Ал министр өз эрки менен кызматтан кетиши керек экенин, болбосо иштен алынарын эскертти.
«Биздин медициналык кызматкерлер жарандарыбыздын өмүрүн сакташ үчүн жан үрөп жатканда мындай нерсе кечиримсиз», - деди Бабиш.
Мунун алдында Роман Примула карантинге карабай Прагадагы ресторанга барганы тартылган сүрөт жарыяланып кеткен. «Blesk» гезити анда Примула премьер-министр Бабиштин ANO партиясынын жогорку расмий өкүлү менен жолугуп жатканын жазган.
Бул жолугушуудан бир нече саат мурда Примула коронавирусту ооздуктоону көздөгөн жаңы чараларды жарыялаган. Ага ылайык, өлкөдө кыймыл чектелип, дээрлик бардык соода жайлары жабылган. Ресторандар менен барлар ага чейин эле убактылуу ишин токтоткон.
Ал эми Бельгия жана бир катар башка өлкөлөрдө чукул эмес операциялар кийинкиге жылдырылды. Польшанын баш калаасындагы чоң стадион талаа стационарына айландырылды.
Күнүнө 30 миңдей адамга инфекция жукканы катталган Францияда ооруканалардын 44% COVID-19га кабылган бейтаптарга толуп калды.
Премьер-министр Жан Кастекстин жарлыгы менен коменданттык саат киргизилген аймактардын саны 38ге жетти. Өткөн аптада сегиз региондо, анын ичинде борбор шаар Парижде түнкүсүн сыртка чыгууга тыюу салынган.
Прогноздор боюнча алдыдагы дем алышта Францияда коронавируска чалдыккандардын жалпы саны 1 миллионго жетиши ыктымал.
Ал эми бул чектен ашып өткөн кошуна Испания коменданттык саат жарыялоону караштырып жатат.
Италиянын Милан, Рим жана башка бир нече жерлеринде түнкү саат 12 жарымдан таңкы саат 5ке чейин көчөгө чыгууга болбойт.
Жазында пандемияны ооздуктоо аракеттери үлгү катары аталып келген Германияда бир күндө вирусту жугузуп алган 10 миң киши аныкталгандан кийин бийлик чектөөчү чараларды катаалдаштырууну чечти.
"Bild" гезитинин жазганына караганда, жыл аягына чейин коронавируска каршы эмдөө кампаниясын баштоого даярдык көрүлүп жатат.
Ал тапта АКШнын Азык-түлүк жана дары-дармектерди тескеген агенттиги COVID-19ду дарылоо үчүн ремдесивир препаратын пайдаланууга уруксат берди. Европа ремдесивирди убактылуу гана жактырган.