Улуттук коопсуздук боюнча мамлекеттик комитет (УКМК) Жаза аткаруу кызматынын (ЖАМК) өмүрүнүн акырына чейин соттолгондор жаза өтөгөн №19 мекеменин жетекчиси (1982-жылы туулган аскер кызматынын майору Ж.М.Ж.) кармалганын билдирди. Ага Кылмыш-жаза кодексинин “пара талап кылуу” беренеси менен кылмыш иши козголгон.
Атайын кызматтын маалыматы боюнча, шектүү 2025-жылдын февраль айынан тартып соттолгон адамдын жакын туугандарынан телефон аркылуу сүйлөшүүгө жана жолугушууга мүмкүнчүлүк түзүп берүү үчүн системалуу түрдө акча талап кылган деп айыпталууда.
“Ыкчам-издөө жана тергөө иш-чараларынын жүрүшүндө акча MBANK мобилдик тиркемеси аркылуу акча которуу жолу менен алынганы аныкталган”, - деп айтылат маалыматта.
Шктүү УКМКнын тергөө абагынын убактылуу кармоочу жайына киргизилип, тергөө иштери уланууда.
Бул фактыга байланыштуу шектүүнүн жакындары менен адвокаттары жана ЖАМК комментарий бере элек. Чүй облусундагы №19 абакта өмүрүнүн акырына чейин соттолгон адамдар жазасын өтөйт. (BTo)
Шерине