Газадагы чукул кырдаалдар кызматтарынын билдиришинче, Израилдин соккусунан бери дегенде он адам, анын ичинде алты бала мерт болду. Чабуул алар канистрлерге суу толтуруп алуу үчүн кезекте турган маалда жасалган. Маалыматтарга караганда, кеминде дагы 16 киши, анын ичинде жети бала жараат алды.
Израилдин армиясы алар "террорчу" деп атаган адамдарды бутага алганда "техникалык ката" кеткенин билдирди. ЦАХАЛ "бул райондогу курмандыктар тууралуу билдирүүлөр тууралуу кабары бар экенин" айтып, "жайкын тургундарга тийген кандай гана кесепет болбосун өкүнөрүн" белгиледи.
Күбөлөрдүн айтымында, качкындардын аль-Нусейрат лагеринде жоон топ адам сууга кезекте турганда аларга учкучсуз аппараттан ракета менен сокку урулган. Социалдык тармактарда жерде канжалап жаткан балдар, адамдар тартылган видеолор тарады.
Би-би-си Газадагы Жарандык коргонуу агенттигинин өкүлүнө шилтеме кылып бул анклавда жекшембиде үч башка районго жасалган чабуулда дагы 19 палестиналык набыт болгонун жазды.
Кызыл чырым эл аралык комитети, ишемби күнү Рафахтагы талаа госпиталына 132 адам ок атуучу куралдан ар кандай жараат алып түшкөнүн, 30дан ашыгы мерт болгонун билдирди. Аларга чабуул азык-түлүк тараткан бекетке баратканда жасалганы айтылып жатат.
Газадагы чабуулдар ХАМАСтын согушкерлери 2023-жылдын 7-октябрында Израилдин аймагына кол салып, миңден ашуун кишини өлтүрүп, жайкын тургундарды барымтага алып кеткенден кийин башталган.
Андан бери Газада Израилдин аба чабуулдарынан жана жердеги операцияларынан оң миңдеген адамдын өмүрү кыйылды.
Жалпысынан Газада ок атышуу бир нече айга токтогону менен согушту толук аягына чыгаруу боюнча дипломатиялык аракеттерден азырынча майнап чыга элек. Анклав күн сайын бомбаланып, аткылоого туш болуп келатат.
Шерине