Мьянмадагы жер титирөөдөн улам набыт болгондордун саны 3 миң 354кө жетти. Ошондой эле 4 миң 850 адам жараат алды, 220сы дайынсыз болууда. Бул тууралуу Reuters агенттиги 5-апрелде Мьянманын мамлекеттик басылмаларына таянып жазды. Өлкөдө 1-апрелден тартып бир апталык аза күтүү жарыяланган.
Бириккен Улуттар Уюмунун (БУУ) өзгөчө кырдаалдагы жардам боюнча координатору Том Флетчер жер титирөөнүн очогу болгон жерге жакын жайгашкан Мандалай шаарына барды.
“Кыйроонун масштабы өтө чоң. Адамдар набыт болгон, үйлөр ураган. Жашоого керектүү каражаттын баары кыйраган. Бирок тургундардын кайраты укмуш”, - деп жазды Флетчер Х социалдык тармагындагы баракчасына.
БУУнун Адам укугу боюнча жогорку комиссарынын кеңсеси жума күнү аскердик хунта эл анын бийлигин колдобогон аймактарга жардам берүүнү чектеп жатканын билдирди.
Ушул аптада Мьянмада бийликти басып алган аскерлер жер титирөөдөн жабыркагандарга жардам көрсөтүү аракеттерин жеңилдетүү үчүн 22-апрелге чейин ок атышууну токтотконун жарыялашты. Бул хунтага каршы күрөшкөн бир нече алдыңкы козголоңчу топтор согуштук аракеттерди бир айга токтоткондон кийин ишке ашты.
БУУнун Адам укуктары боюнча комиссары Фолкер Түрк ок атышууну токтотуу менен бирге куткаруучулардын жана гуманитардык кызматкерлердин жабыркаган бардык аймактарга тоскоолдуксуз киришин камсыздоо зарылдыгын билдирди.
28-мартта Мьянмада магнитудасы 7,7ге жеткен жер титирөө болгон. Силкинүүлөр Тайланд, Кытай жана Вьетнамда да сезилген. Тайланддын борбору Бангкок шаарында 30 кабаттуу курулуп бүтө элек имарат урап түшкөн.
Жалпысынан Тайландда жер титирөөнүн айынан 19 адам каза болуп, дагы 75 адам дайынсыз жоголгон.
Шерине