Израилдин премьер-министри Биньямин Нетаньяху Вашингтонго барып, Ак үйдө АКШ президенти Дональд Трамп менен жолугуп, импорттук пошлина маселесин талкуулоону пландап жатканын 5-апрелде Deutsche Welle бир нече маалымат булагына таянып жазды.
Эки жетекчинин жолугушуусу 7-апрелде өтүшү мүмкүн экени, анда АКШга товар импорттоо үчүн пошлина төлөө талабын жокко чыгаруу өтүнүчү келтирилери, мындан тышкары Газа секторундагы абал жана АКШ менен Иран ортосундагы өзөктүк келишим маселеси да талкууланары маалымдалды.
Израилдин премьер-министри менен жолугарын Дональд Трамп өзү да айтты. 4-апрелде журналисттердин суроолоруна жооп берип жатып ал Венгриянын премьер-министри Виктор Орбан менен, ошол учурда Будапештте иш сапрада жүргөн Нетаньяху менен телефондон сүйлөшкөнүн, Венгриянын Эл аралык кылмыш сотунун курамынан чыгуу демилгесин, тариф маселесин талкуулаганын жана Нетаньяхуга жолугушууну сунуштаганын айтты.
Биньямин Нетаньяху Эл аралык кылмыш сотунун ордерине карабай 3-апрелде Венгрияга барган. Бул анын Европага 2023-жылдан берки биринчи сапары болду.
АКШ президенти Дональд Трамп Кошмо Штаттардын бардык соода өнөктөштөрүнө тарифтер киргизилгенин 2-апрелде жарыялаган.(RK)
Шерине