АКШ президенти Дональд Трамп Кытайдын ByteDance технологиялык компаниясына Кошмо Штаттардагы популярдуу TikTok тиркемесинин америкалык активдерин кытайлык эмес тарапка сатууга берген мөөнөттү дагы 75 күнгө узартты. Бул тууралуу 4-апрелде Reuters маалымат агенттиги жазды.
Эгер аталган компания өзүнүн бул тиркемесин сатпаса, АКШдагы ишмердүүлүгүнө тыюу салынат деген мөөнөт быйыл январь айында эле берилген.
Бир жыл мурда АКШ Конгрессинин Өкүлдөр палатасынын чечими менен кабыл алынган мыйзамга ылайык, эгер TikTok тиркемесине ээлик кылган кытайлык ByteDance компаниясындагы америкалык бөлүм өзүнчө чыгарылбаса, бул социалдык түйүнгө АКШда таптакыр тыюу салууга мүмкүнчүлүк бар.
Америкалык мыйзам чыгаруучулар Кытай өкмөтү бул тиркеме аркылуу америкалыктардын артынан тыңчылык кылып, өзүнүн жашыруун таасир этүүчү операцияларын ишке ашырышы мүмкүн деген кооптонуусун билдиришкен.
Конгресстеги эки палата тең көпчүлүк добуш менен колдогон мыйзамга ошол кездеги президент Жо Байден кол койгон.
АКШда TikTok тиркемесине тыюу быйыл 19-январда салынмак, бирок Трамп бийликке келер замат бул мөөнөттү 5-апрелге чейин узарткан.
Трамп 4-апрелде билдиргендей, Ак үй азыркы тапта TikTok боюнча төрт компания менен сүйлөшүү жүргүзүп жатат жана акыркы чечимге келип, тийиштүү документтерге кол коюш үчүн убакыт талап кылынат. АКШ президентинин айтымында, TikTok маселеси Кытай менен импорттук пошлиналар боюнча сүйлөшүүлөрдө колдонулуучу шарттардын бири болушу да ыктымал.
4-апрелде Кытайдын Каржы министрлиги АКШнын президенти Дональд Трамп киргизген бажы тарифтерине жооп иретинде АКШнын бардык товарларына 34% кошумча бажы төлөмүн киргизди. Бул тууралуу Reuters агенттиги жазды. Маалыматка караганда, жаңы эреже 10-апрелден тартып иштейт.
АКШ президенти Дональд Трамп Кошмо Штаттардын бардык соода өнөктөштөрүнө тарифтер киргизилгенин 2-апрелде жарыялаган.(RK)
Шерине