Орусиялык аскерлер Украинанын Кривой Рог шаарынын кичи райондорунун бирине 4-апрелдин кечинде баллистикалык ракета менен, андан кийин согуштук дрондор менен сокку урду. Шаар жайгашкан Днепропетровск облусунун аскердик администрациясы билдиргендей, кеминде 18 киши каза болду, алардын 9у балдар. Жараат алгандар 61 киши. Дрон соккусунан дагы бир киши набыт кетти.
Жарыяланган сүрөттөргө караганда, ракетада кассеталык ок-дары болгон жана ал балдар ойноочу жайдын жанына түшкөн.
Жараат алган 40тай киши ооруканага жеткирилген. “Абалы оор жана аябай оор кишилер бар. Алардын өмүрү үчүн дарыгерлер күрөшүп жатышат”, - деди шаардык аскердик администрациянын башчысы Александр Вилкул.
Днепропетровск облусунун башчысы Сергей Лысак Телеграм каналына жазгандай, жараат алган балдардын эң кичүүсү үч айлык.
Украинанын президенти Владимир Зеленский каза болгондордун арасында балдар да бар экенин белгилеп, “Күн сайын орусиялык соккулар. Күн сайын адамдар өлүп жатат. Бул эмнеге уланып жатканына бир эле себеп: Орусия ок атышууну токтоткусу келбейт. Муну биз да, дүйнө да көрүп турат”, - деп Телеграм каналына жазды.
Бир нече булак ракета “Магеллан” рестораны жайгашкан аймакта жарылганын билдиришти. Ондогон үй, машина зыян тартты. Айрым үйлөргө газ берүү үзгүлтүккө учурады.
Орусиянын Коргоо министрлиги Кривой Рогго ракеталык чабуулун “командирлердин жыйыны өткөн жерге урулган таамай сокку” деп атады. Мекеменин маалыматында айтылгандай, Орусиянын Куралдуу күчтөрү "фугас түрүндөгү ракета" менен "бир ресторанда өткөн командирлердин жана Батыш инструкторлорунун жыйыны болгон жерге" сокку урган.
Евробиримдиктин тышкы саясат боюнча комиссары Кая Каллас социалдык тармактагы баракчасына мындай деп жазды:
"Кривой Рогдон алынган кайгылуу жана адамкерчиликке жатпаган кадрлар. Орусиялык аскерлердин дагы бир ойлонулбаган чабуулу калк жыш жайгашкан турак жай районуна жасалды. Орусия Украинаны кыйратуусун улантып жатат жана тынчтыкка кызыкдар эмес".
Чехиянын тышкы иштер министри Ян Липавский Х социалдык түйүнүндөгү баракчасына:
"Балдар аянтчасына ракета атуу – бул согуш эмес, жапайычылык. Биз каза болгондордун үй-бүлөлөрү жана өз өлкөсүн орус баскынчылыгынан коргоп жаткан адамдар менен биргебиз. Чехия сиздер менен”.
Литванын башкы дипломаты Кястутис Будрис Кривой Рогдогу окуяны “Путиндин элдешүүсү” деп мүнөздөдү.
2-апрелде Кривой Рог шаарындагы өндүрүш ишканалардын бирине баллистикалык ракета менен сокку урулуп, натыйжада төрт адам каза болуп, 14 адам жараат алган. Бир нече көп кабаттуу турак үй жабыркаган.
4-апрелдеги ракеталык соккудан кийин Кривой Рог дрон чабуулуна кабылды. Шаар бийлигинин 5-апрелдеги соңку маалыматына караганда, үйлөр, унаа каражаттары, трамвай жолдору, балдар аянтчалары жарактан чыкты. Жараат алгандар жети, каза болгон бир киши.
Кривой Рог — Украинанын ири өнөр жай борборлорунун бири. Ал жерде бир нече тоо-кен жана металлургиялык ишканалар жайгашкан.
Шерине