Орусиянын Түз инвестициялар фондунун башчысы, орус президентинин чет өлкөлөр менен инвестициялык жана экономикалык кызматташуу боюнча атайын өкүлү Кирилл Дмитриев 3-апрелде Вашингтондо АКШ администрациясынын өкүлдөрү менен жолугушту.
"Биз Арктикадагы жана сейрек кездешүүчү металлдар жаатындагы, ошондой эле натыйжалуу иштеше ала турган дагы башка тармактар боюнча талкуу өткөрдүк", - деди Дмитриев ТАСС агенттигине.
Ошондой эле ал "АКШдагы кесиптештерин Орусияга иш сапар менен келүүгө чакырганын" айтты.
Буга чейин айрым маалымат каражаттары ал АКШ президентинин атайын чабарманы Стив Уиткофф менен жолугарын кабарлашкан. Би-Би-Си радиосу Дмитриев ким менен жолукканын тактап айтпаганын, бирок ал жолугушуу тууралуу оң пикирин билдиргенин жазды.
"Биз азыркы президенттин администрациясы Жо Байденден айырмаланып, маселелерди чечүүгө умтулуп жатканын көрүп турабыз. Алар өзүн өтө сыпайы алып жүрүшөт. Орусиянын позициясын түшүнүп, ошого карата суроо берип, компромисс тапканга аракет көрүшөт. Мына ушундай жаратмандык дем бар", - деди ал.
Дмитриев пандемия учурунда, кийин Орусиянын Украинага согушу башталганда токтогон Орусия менен АКШ ортосундагы түз аба каттамдарын калыбына келтирүү ыктымалдыгы тууралуу да айтты.
"Биз бул боюнча иш алдыга жылат деген үмүттөбүз", - деди ал.
Дмитриев Орусиянын Украинага каршы согушу башталгандан бери Вашингтонго барган биринчи орусиялык жогорку кызматтагы аткаминер. АКШга виза берүү үчүн ага салынган санкциялар убактылуу алынганы кабарланды.
Мурдагы инвестициялык банкир Кирилл Дмитриев орус президенти Владимир Путиндин жакын адамдарынын бири экени айтылып жүрөт.
Анын сапары тууралуу Ак үй азырынча комментарий бере элек. (AiA)
Шерине