Президент Садыр Жапаров 4-апрелде Өзбекстандын Самарканд шаарында өткөн “Борбор Азия – Европа бирлиги” саммитинде сүйлөгөн сөзүндө коңшу өлкөлөр менен кызматташтыкты тереңдетүү Кыргызстандын тышкы саясатынын негизги артыкчылыктарынын бири экенин айтты.
2022-жылы Кыргызстан Өзбекстан менен мамлекеттик чек араны мыйзамдуу түрдө каттоо боюнча тарыхый келишимге жетишкенин, 2025-жылы Тажикстан менен чек ара боюнча келишим түзүлүп, 25-мартта ратификациядан өткөнүн кошумчалады.
Андан тышкары акыркы төрт жылда Кыргызстандын Европа бирлигинин өлкөлөрү менен соода жүгүртүүсү 2,4 эсе, анын ичинде импорт 2,6 эсе, экспорт 1,5 эсе көбөйгөнүн билдирип, Европа мамлекеттерин Кыргызстандагы гидроэнергетика долбоорлоруна кошулууга чакырды.
“Камбар-Ата-1 ГЭСи флагмандык долбоору биздин пландарыбызда өзгөчө орунду ээлейт. Биз бул ири гидроэлектр станциясынын курулушун баштадык, анын долбоордук кубаттуулугу 1860 мВт жана жылына 5,6 миллиард кВт/саат иштеп чыгышы болжолдонууда. Аталган долбоор коңшуларыбыз Казакстан жана Өзбекстан менен биргеликте ишке ашырылып жатат”, - деди президент.
Садыр Жапаров Кыргызстанда сейрек кездешүүчү жана баалуу металлдардын кору көп экенин белгилеп, бул жаатта да кызматташууга болорун айтты.
“Борбор Азия – Европа бирлиги” саммитине Казакстандын президенти Касым-Жомарт Токаев, Өзбекстандын лидери Шавкат Мирзиёев, Тажикстандын мамлекет башчысы Эмомали Рахмон, Түркмөнстандын президенти Сердар Бердымухамедов, ошондой эле Еврокомиссиянын президенти Урсула фон дер Ляйен жана Европа кеңешинин президенти Антониу Кошта катышты.
Саммиттин алдында укук коргоочулар Евробиримдиктин лидерлерин аймактагы адам укуктарынын абалына көңүл бурууга чакырышкан. (BTo)
Шерине