Венгрия Эл аралык кылмыш сотунан чыгарын жарыялады. Мындай чечим Израилдин премьер-министри Биньямин Нетаньяху Будапештке барган маалда кабыл алынды.
Буга чейин Эл аралык кылмыш соту Нетаньяхуну Газадагы согуш кылмыштарына байланыштуу камакка алуу ордерин чыгарган эле.
Венгриянын премьер-министр Виктор Орбандын аппарат башчысы Гергей Гуляш мамлекеттик MTI жаңылыктар агенттигине берген маегинде, өкмөт Гаагадагы Эл аралык кылмыш сотунан чыгуу чечимин кабыл алганын билдирди.
“Венгрия Эл аралык кылмыш сотунан чыгат. Өкмөт 3-апрелде конституциялык жана эл аралык укуктук алкактарга ылайык чыгуу жараянын баштайт”, – деп жазды Гуляш билдирүүсүндө.
Венгриянын Эл аралык кылмыш сотунан чыгуу процесси бир жылга чейин созулушу мүмкүн, анткени мындай кадамды парламент бекитиши керек.
Бул билдирүүгө чейин эле Нетаньяху Венгрияда камакка алынбай турганы анык болчу.
Себеби Виктор Орбан ноябрда Нетаньяхуну расмий түрдө чакырып, анын коопсуздугуна кепилдик берерин билдирген.
"Эгер ал келсе, мен анын бул жерде бардык көйгөйдөн оолак кармап, коопсуздугун камсыз кылам", - деген эле ал.
Орбан Нетаньяху жана АКШнын президенти Дональд Трамп менен тыгыз кызматташып келет.
Трамп да Эл аралык кылмыш сотунун Нетаньяхуну камоо ордерине каршы чыгып, аны "негизсиз" деп сыпаттаган жана сотко каршы санкция киргизген.
Венгрия Рим статутун 2001-жылы ратификациялаган. Эл аралык кылмыш соту өзү эч кимди камай албайт. Анын ордерин аткаруу Рим статутуна кол койгон өлкөлөргө жүктөлгөн.
Шерине