Орусиянын Рособрнадзор мекемеси мигранттардын балдары үчүн орус тилин билүү экзаменинин талаптарын күчөттү. Эми мектепке кириш үчүн бала берилген суроолордун 90 пайызына туура жооп бериши керек. Бул тууралуу Мамлекеттик Думанын спикери Вячеслав Володин өзүнүн Telegram-каналында жазды. Мурун мектепке кабыл алуу үчүн 30 пайыздык көрсөткүч жетиштүү болчу.
Рособрнадзор мындай талаптар баланын орус тилин канчалык деңгээлде өздөштүргөнүн так аныктоого, окуу программасын ийгиликтүү өздөштүрүүгө жана орус мектептерине ыңгайлашууга жардам берет деп эсептейт.
Ошол эле учурда, "Справедливая Россия" партиясынын башчысы Сергей Миронов Рособрнадзордун ишин сынга алды. Анын айтымында, мекеме өтө эле жөнөкөй суроолорду иштеп чыккан, алар мектепке кирүүчүлөргө эмес, үч жаштагы балдарга ылайыктуу.
"Рособрнадзор, силер эмнени ойлоп жатасыңар? Бул эмне деген акылга сыйбаган иш! Депутаттар мектептерде тартип болушу үчүн туура мыйзам кабыл алышты.Биз болсо мына ушундай тесттерди көрүп жатабыз. Бул болбойт!", - деп жазды ал социалдык тармактардагы баракчасына.
Былтыр жыл соңунда Орусиянын президенти Владимир Путин мыйзамсыз мигранттардын балдарын мектепке жана бала бакчага кабыл алууга тыюу салган мыйзамга кол койгон.
Мыйзам мигранттардын балдары орус тилин начар билсе да мектепке алууга тыюу салат - тестирлөө мектепке кабыл алууда милдеттүү түрдө киргизилет.
Путин бул мыйзамды 19-декабрда түз эфирде комментарийлеп жатып: "Тил билбеген баланы мектепте кантип окутууга болот? Анда балага орус тилин өзүнчө үйрөтүү керек, ал үчүн ким төлөйт?", - деген.
Быйыл жыл башынан бери Орусияда мигранттарга каршы бир катар мыйзамдар кабыл алынды.
Шерине