Мьянмадагы жер титирөөдөн каза болгондордун саны 3085 адамга жетти. 4715тен ашуун адам жараат алганын 3-апрелде Мьянманын аскердик бийлиги билдирди. Өлкөдө 1-апрелден тартып бир апталык аза күтүү жарыяланган.
"Франс-пресс" агенттигинин маалыматына ылайык, кыйраган имараттардын алдынан адамдар аман чыгат деген үмүт дээрлик өчүп баратат.
Куткаруу иштерин жүргүзүү ысыктан улам татаалдашууда. Учурда өлкөдө абанын табы 40 градуска жетип жатат.
Дүйнөлүк саламаттык сактоо уюму (ДССУ) өлкөдө жарандык согуш жүрүп жаткандыктан, ар кандай оорулар жайлышы мүмкүн экенин эскертип, аймакта эң жогорку деңгээлдеги өзгөчө кырдаал режимин жарыялады.
Уюмдун маалыматына ылайык, Мьянмага эң зарыл делген жардамды көрсөтүү, оорулардын жайылышын алдын алуу жана керектүү медициналык кызматтарды калыбына келтирүү үчүн шашылыш түрдө сегиз миллион доллар (7,4 миллион евро) талап кылынат.
Мьянманын аскердик өкмөтүнүн башчысы Мин Аун Хлайн "ар бир өлкөдөн, ар бир уюмдан" жардам сурады.
28-мартта Мьянмада магнитудасы 7,7 баллга жеткен жер титирөө болгон. Силкинүүлөр Тайланд, Кытай жана Вьетнамда да сезилген. Тайланддын борбору Бангкок шаарында 30 кабаттуу курулуп бүтө элек имарат урап түшкөн.
Жалпысынан Тайландда жер титирөөнүн айынан 19 адам каза болуп, дагы 75 адам дайынсыз жоголгон.
Шерине