АКШ президенти Дональд Трамп Кошмо Штаттардын бардык соода өнөктөштөрүнө тарифтер киргизилгенин жарыялады
Ак үйдөгү бакчасында өткөн иш-чарада Трамп 2-апрелди “Америка үчүн боштондук күнү” деп атап, “америка өнөр жайынын кайра жаралуу күнү эсте калат” деп билдирди. Ал “АКШны өнөктөштөр да, душмандар да ондогон жылдар бою тоноп келишкенин” деп , тариф киргизилген өлкөлөрдүн тизмеси жазылган тактаны көрсөттү.
Ага ылайык, Трамп өз жарлыгы менен Кытайдан импорттолгон товарларга 34 пайыздык, Евробиримдик өлкөлөрүнө 20 пайыздык, Жапонияга 24, Индияга 26 пайыздык, ал эми АКШга импорттоочу дагы ондогон өлкөлөргө 10 пайыздык базалык тариф киргизилгени белгилүү болду. Борбор Азия өлкөлөрүнөн Казакстанга 27 пайыз болсо, калган Кыргызстан баштаган төрт өлкөдөн АКШга сатылган товарлар базалык 10 пайыздык тарифке туш болот.
Дональд Трамп АКШнын өнөктөш өлкөлөрү америкалык товарлар үчүн өз өлкөсүндө жогорку тарифтерди коюп, ал эми Кошмо Штаттарга төмөнкү тариф менен товарларын сатып, пайдага туйтунган деп эсептейт. Ошондуктан дүйнөдөгү жүздөгөн өлкөлөргө “жооп пошлиналарын” киргизүү АКШнын экономикасына, өнөр жайына пайдалуу болорун билдирүүдө.
Трамп жарыялаган тизмеде Орусия жок. Муну АКШнын тышкы соодасында Орусиянын үлүшү аз экени, Кошмо Штаттардын негизги 25 соода өнөктөшүнүн катарына кирбей турганы менен түшүндүрүлүүдө.
Трамптын соңку жарлыгы дүйнөдөгү бир катар экономисттердин тынчсыздануусун жаратты. Алар муну “соода согушу” деп атап, тарифтер дүйнөлүк экономиканын өнүгүшүн басаңдатып, рецессия тобокелчилигин жогорулатат деп тынчсызданууда. Анын ичинде америкалыктар үчүн да кесепети болорун айрым эксперттер айтууда.
Британиянын финансы министри Рейчел Ривз Трамптын билдирүүсүнө алгачкылардан болуп жооп кайтарып, “Соода согуштары эч качан эч кимге пайда алып келген эмес” деп билдирди.
Шерине