Европа Биримдигинин кеңейүү маселелери боюнча комиссары Марта Кос "Эркин Европа/Азаттык" радиосун коргоо зарылдыгын белгиледи:
"Эгерде ал кадамга барбасак, дүйнө жүзүндөгү автократтарга белек кылган болобуз", - деди Марта Кос 1-апрелде Страсбургда Европарламенттин пленардык жыйынында демократиялык маалымат каражаттары, анын ичинде "Эркин Европа/Азаттык" радиосуна байланышкан талкууда.
"Европа Биримдиги көз карандысыз маалымат каражаттары, анын ичинде Орусия жана Беларустун журналисттери үчүн коопсуз башпаанек болушу керек. Ошондо гана алар коррупциянын бетин ачуу ишин уланта алышат", - деди ал.
15-мартта USAGM “Эркин Европа/Азаттык” радиосуна берилген грантты токтотконун жарыялаган. Бул чечим АКШнын президенти Дональд Трамптын буйругунан бир нече саат өтпөй кабыл алынган. Буйрукта жети өкмөттүк агенттикти, анын ичинде USAGMди да мүмкүн болушунча кыскартуу талап кылынган.
"Эркин Европа/Азаттык" радиосу Кошмо Штаттардын Конгресси бөлгөн каражатты алуу үчүн АКШнын Глобалдык медиа агенттигине (USAGM) каршы сотко кайрылган. Радио өзүнүн доо арызында USAGM агенттигинин андай укугу жок экенин, анткени грант Конгресстин чечими менен берилерин жүйө келтирген.
25-мартта АКШ соту USAGM агенттигинин грантты токтотуу чечимин "негизсиз жана туура эмес" деп тапкан. Вашингтондогу округдук сот Ройс Ламберт 10 барактан турган чечиминде “Эркин Европа/Азаттык” радиосун жабуу тууралуу аракеттерди токтотуу үчүн убактылуу бөгөт коюучу буйрук зарыл экенин, бул чечим коомчулуктун кызыкчылыгы үчүн кабыл алынганын, радионун алдыдагы негизги соттук отурумдарда жеңип чыкчудай мүмкүнчүлүгү бар экенин жазган.
Ушундан кийин 26-мартта USAGM “Эркин Европа/Азаттык” радиосуна кайра кат жолдоп, 15-марттагы билдирүүсүн жокко чыгарганын, бирок грантты токтотуу укугу сакталып калганын белгилеген.
“Эркин Европа/Азаттык” радиосу Конгресс бөлгөн каражатты алуу үчүн соттук ишин улантып жатканын 28-мартта жарыялады.
Грантты токтотуу тууралуу катка бир нече апта мурда агенттикке улук кеңешчи болуп дайындалган Кэри Лейк агенттиктин жетекчисинин милдетин аткаруучунун атынан кол койгон.
USAGM “Эркин Европа/Азаттык” радиосун жана башка Американын бир катар эл аралык медиасын көзөмөлдөйт. (AiA)
Шерине