Жогорку Кеңештин депутаты Дастан Бекешев Беларуста баш калкалап жүргөн мурдагы президент Курманбек Бакиев Кыргызстанда кайсы каражатка жана кимдер аркылуу ооз ачыруу өткөргөнү тууралуу маселе көтөрдү. Бул тууралуу ал парламенттин 2-апрелдеги жыйынында сүйлөгөн сөзүндө айтты.
“Акчаны которууга ким шарт түзүп берди? Бул жерде ооз ачууну кайсы акчага уюштурду? Ал боюнча (ред: Курманбек Бакиев) соттун чечими бар, анын негизинде бул акчанын баары мамлекеттин пайдасына алынышы керек болчу. Эгерде соттун чечими жокко чыгып кетпесе эле”, - деди ал.
Депутат бул боюнча мыйзамсыз курулган деген негиз менен алынып жаткан курулуштар, үйлөр тууралуу билдирүү жасап жатып айтты. Ал каражатты карапайым элден эмес, башка булактардан да тапса болорун кошумчалады.
Аскаттейит Нурудунов деген Фейсбуктун колдонуучусу 24-мартта Курманбек Бакиевдин Март ыңкылабынын 20 жылдыгына жана Орозо айына байланыштуу Жалал-Абадда ооз ачар өткөргөнүн жазып, видео жүктөгөн.
Соңку жылдары өлкөдө мурдагы президент Курманбек Бакиев боюнча маселе утур көтөрүлүүдө. Президент Садыр Жапаров 11-мартта Беларус “Курманбек Бакиевди камабасаңар өткөрүп берели” деп жатат” деген.
Кыргызстандын мурдагы президенти Курманбек Бакиев президенттик бийликке 2005-жылкы 24-март ыңкылабынан кийин келип, 2010-жылдын 7-апрелиндеги 90го жакын адамдын өмүрү кыйылган элдик толкундоодо бийликтен кулатылган жана үй-бүлөсү менен Беларуска качып кеткен.
“Апрель окуясы” боюнча соттук жараяндын жыйынтыгында мурдагы президент Курманбек Бакиев баш болгон 28 адамга айып коюлган. Курманбек Бакиевди 30 жылга, бир тууган иниси, Мамлекеттик күзөт кызматынын мурдагы башчысы Жаныш Бакиевди өмүрүнүн акырына чейин, ошол кездеги өкмөт башчы Данияр Үсөновду 15 жылга кесүү боюнча сыртынан өкүм чыккан. Курманбек Бакиевдин тун уулу Марат Бакиев сырттан 30 жылга соттолгон, кичүү уулу Максим Бакиевге бир катар иштердин алкагында сыртынан өмүр бою камоо чечими чыккан.
Курманбек Бакиев жана анын үй-бүлөсү Беларустун башында турган Александр Лукашенконун жеке калкалоосунда экени айтылып келет. Кыргызстандын аларды экстрадициялоо өтүнүчүн расмий Минск четке каккан. (BTo)
Шерине