Президент Садыр Жапаров 31-мартта иш сапары менен Тажикстандын Кожент шаарына барды.
Мамлекет башчынын басма сөз кызматы Садыр Жапаровду Кожент эл аралык аэропортунан Тажикстандын президенти Эмомали Рахмон тосуп алганын билдирди. Сапардын алкагында Кыргызстандын, Тажикстандын жана Өзбекстандын президенттеринин үч тараптуу саммитин өткөрүү пландаштырылууда.
“Анын негизги максаты үч өлкөнүн ортосунда мамлекеттик чек аралардын кесилишкен чекити жөнүндө келишимге кол коюу, ошондой эле маданий-гуманитардык чөйрөдө мындан аркы кызматташууну бекемдөө болуп саналат”, - деп айтылат билдирүүдө.
Анын жыйынтыгында үч өлкөнүн мамлекет башчыларынын биргелешкен билдирүүсү кабыл алынат. Андан тышкары Кыргызстан, Тажикстан жана Өзбекстандын премьер-министрлеринин орун басарларынын катышуусу менен онлайн форматта мамлекеттик чек аралар кесилишкен чекитинде орнотулчу стеланын (мемориалдык такта) ачылыш аземине катышышат.
13-мартта Эмомали Рахмон Кыргызстанга мамлекеттик сапары менен келип, кыргыз-тажик чек арасы тууралуу келишимге эки өлкөнүн башчылары Садыр Жапаров жана Эмомали Рахмон кол коюшкан.
Садыр Жапаров 25-мартта Кыргызстан менен Тажикстандын чек арасы тууралуу келишимди ратификациялоо боюнча мыйзамга кол койгон. (BTo)
Шерине