Үч жыл мурун Орусия Украинага ар тараптан басып киргенден бери өлкө боюнча ар бир он үйдүн бири бузулуп же такыр талкаланды. Айрым шаар-кыштактар калыбына келтирилгени менен спутниктен тартылган сүрөттөр орус армиясынын кыянаттыгын даана айгинелейт.

Бахмут шаары: 2024 - 2022

Украинанын чыгышындагы Бахмут шаары согуштагы эң кандуу кармаштын ордосуна айланган. Согушка чейин атагы алыска кеткен кызыл шарап чыккан Бахмутта 70 миң киши жашаган. 2023-жылы май айында шаар мэри Алексей Рева Бахмут "урандыга жана күлгө" айланганын айтып, калаада 500 киши калганын билдирген.

Адам укугун коргоочулар Украинада 2024-жылы 576 билим берүү мекемеси талкаланып, мурдагы жылдарга салыштырганда кыйроонун көлөмү эки эсе көп болгонун айтышкан.

"Балдарды коргоо" эл аралык уюму миңдеген бала онлайн же жер төлөдөгү мектептерде билим алып жатканын өткөн айда билдирген.

"Украинадагы окуу жайларды бомбалоо эл аралык гуманитардык укукка каршы жана таптакыр келишкис нерсе. Андыктан чабуулдар тезинен токтотулушу керек", - деп билдирген уюмдун Украинадагы директору Соня Хуш январь айында.

Мариуполдогу мектеп

Азов деңизинин боюндагы порт шаар Маруиполдогу №66 мектеп 2018-жылы жаңыланып, калаадагы заманбап шарты бар окуу жайы саналчу. Азыр ал урандыга айланган.

Дүйнөлк банк, БУУ жана Еврокомиссия 2024-жылы февралда чогуу жарыялаган баяндамада Украинаны кайра куруу үчүн болжол менен 486 миллиард доллар кетет деп санашкан.

Марьинка

Согушка чейин Марьинка шаарында 9 миңдей киши жашачу. 2022-жылы ноябрда шаар толук талкаланып, эч ким калган эмес. Азыр дагы каңгырап ээн турат.

Украинанын вице-премьер-министри Алексей Чернышов ушул ай башында өлкөнү калыбына келтирүү үчүн ички дүң өнүмдү эки эсе көтөрүү керектигин айткан. Чернышов Фейсбукка жазган постунда өндүрүштүн азыркы ыргагында 4,5 миллион жумушчу күчү жетпей турганына токтолгон.

Соледар

Туз казылган Соледар шаары - Орусия болгон күчүн салган кан майдандагы очоктордун бири. Шаардын инфраструктурасынын таш-талканы чыккан.

2024-жылы жазында жүргүзүлгөн сурамжылоо көрсөткөндөй, Киевдин сыртындагы Ирпен жана өлкөнүн түштүк-чыгышындагы Харьков шаарларынын көпчүлүк тургундары үй-жайын өздөрү оңдоп-түзөп алышканын айтып беришкен.

Харьковдун сурамжылоого тартылган тургундарынын үчтөн бири Ирпендин жашоочуларынын жарымы Украинанын кайра калыбына келтирүү программасына жардам сурап кайрылганын айтып беришкен. Ал эми өз акчасына үй-жайын оңдоп-түзөгөндөр өкмөттөн ал каражатты кайтарып аларына ишенбейт.

Рубежное

Украинанын чыгышындагы Рубежное шаарындагы эң кандуу кармаш 2022-жылы мартта болгон. Ошол жылдын май айынан бери шаар Орусиянын оккупациясында калган.

Кыргызстандык 38 жаштагы Руслан Полотов ушул Рубежное шаарында орус күчтөрүнүн катарында согушуп жүрүп, 2022-жылы жазында набыт болгон.

Дүйнөлүк банктын, украин өкмөтүнүн, Еврокомиссиянын жана БУУнун 2024-жылдын декабрында жарыяланган эсебинде Орусия басып кирип, согуш ачкандан кийин Украинада ар бир он үйдүн бири же андан көбү бузулуп же такыр талканганы белгиленген.

Северодонецк

Луганск облусундагы Северодонецк шаары 2022-жылдан бери эле такай орус армиясынын бомбалоосунда турат. Ошол жылы июнда орус күчтөрү шаардан сүрүлгөнү менен кийин кайра калааны ээлеп алышкан.

АКШнын мамлекеттик катчысы Марко Рубио ушул айда берген интервьюсунда Кошмо Штаттар Украинанын экономикасына инвестиция салып, анын ичинде кен байлыктарын казуу укугуна ээ болгон биргелешкен ишканаларды куруу үчүн бул өлкөнүн узак мөөнөттүк эгемендигине кызыкдар экенин айтты.

Рубио Вашингтон Украинага короткон миллиарддаган долларды кайтарууга жана ошол эле акчанын бир бөлүгүн "Украинаны калыбына келтирүү үчүн кайра реинвестиция болоруна" токтолду.

Орехов

Запорожье облусунун түштүгүндөгү 14 миң киши турган Орехов 2022-жылы февралда Орусия басып киргенден тарта майдан тилкесинде турган шаар болду. Расмий билдирүүлөрдө ал жерде болгону бир нече жүз киши калганы айтылат.