Улуттук коопсуздук боюнча мамлекеттик комитет (УКМК) Фейсбук социалдык тармагында Ali Osman деген ат менен катталган 47 жаштагы адам (К.А.А.) Кылмыш-жаза кодексинин “Массалык башаламандык” жана “Расалык, этностук, улуттук, диний же региондор аралык кастыкты (араздашууну) козутуу” беренелерине шек саналып кармалганын билдирди.
Атайын кызматтын маалыматына ылайык, ага Фейсбукта массалык башаламандыктарга жана бийлик өкүлдөрүнүн мыйзамдуу талаптарына активдүү баш ийбөөгө чакырыктарды байма-бай жарыялап келген деген айып коюлду.
К.А.А. жоопкерчиликтен качуу үчүн фейк аккаунттарды колдонгону айтылат. Андан тышкары ал Кыргызстанда тыюу салынган “Хизбут-Тахрир” диний-экстремисттик уюмунун активдүү мүчөсү экени аныкталган.
Шектүүнүн жакындары менен адвокаттары комментарий бере элек.
УКМК расалык, этностук, улуттук, диний же региондор аралык кастыкты козутууга, ошондой эле массалык башаламандыктарды уюштурууга жана ага катышууга багытталган аракеттер үчүн мыйзамда 10 жылга чейинки мөөнөткө эркинен ажыратуу жазасы каралганын эскертти.
Кыргызстанда буга чейин да социалдык тармактардагы билдирүүлөрү үчүн адамдарга иш козголуп соттолгон же камалып чыккан окуялар болгон. (BTo)
Шерине