Жогорку Кеңештин комитет кызматкерлеринин Жаңы жылдык кечедеги чырына байланыштуу ишти Бишкектин Октябрь райондук милициясы иликтөөдө.
Октябрь райондук ички иштер башкармалыгынан (РИИБ) маалымдашкандай, милицияга К.Р. аттуу жаран арыз менен кайрылып, 28-декабрга караган түндө У.А. аттуу жаран күч колдонуп, денесине жаракат келтиргени үчүн чара көрүүнү суранган. Арыз ээси окуя Бишкектин Анкара көчөсүндөгү ресторандардын биринде болгонун билдирген.
Бул факт боюнча Октябрь райондук милициясы Кылмыш-жаза кодексинин 280-беренеси ("Ээнбаштык") менен кылмыш ишин козгоп, соттук-медициналык экспертиза дайындалган. Анын жыйынтыгына жараша окуяга укуктук баа берилмекчи.
Айрым маалымат каражаттары 27-декабрда Жогорку Кеңештеги бир комитеттин кызматкерлери Анкара көчөсүндөгү ресторанда жаңжалдашып, натыйжада бир кызматкерди бөлүм башчысы сабап койгону тууралуу жазып чыгышкан. Анда жабыркаган кишинин жакындары сабалды делген К.Р. аттуу жарандын баш жана бет сөөктөрү сынганын, денеси көп жеринен жаракат алганын билдиришкен.
Жогорку Кеңештин маалымат кызматы окуяны комментарийлей элек.(ZKo)
Шерине