Түштүк Кореянын кызматтан убактылуу четтетилген президенти Юн Сок Ёл прокуратурага суракка чакыртылды. 17-декабрда жергиликтүү Yonhap агенттиги жазгандай, аны аскердик абал жарыялоо менен кызматынан кыянаттык пайдаланган деп айыптап жатышат. Ал өзү дооматтардын баарын четке кагууда.
Агенттик ушуну менен ал экинчи жолу прокуратурага чакыртылганын кошумчалады. Биринчи жолкусунда барган эмес. 21-декабрга чейин суракка барбаса, анда аны камоого ордер чыгаруу маселеси каралат.
Прокуратурадан тышкары Юн Сок Ёлду биргелешкен тергөө тобу да суракка чакырган. Ал комиссия полиция өкүлдөрүнөн, жогорку даражадагы аткаминерлер арасындагы коррупцияны иликтеген башкармалыктын мүчөлөрүнөн жана Коргоо министрлигинин тергөө бөлүмүнүн өкүлдөрүнөн турат.
Ошондой эле тергөөчүлөр президенттин коопсуздук кызматынын кеңсесинде тинтүү жүргүзгөнү маалым болду.
14-декабрда Түштүк Корея парламентинин 300 депутатынын 200дөн көбү Юн Сок Ёлго импичмент жарыялоону колдогон. Буга президенттин 3-декабрда күтүүсүз аскердик абал жарыялашы түрткү болду.
Эми бул маселени Конституциялык сот караш керек. Президент убактылуу кызматынан четтетилди. Анын милдетин өкмөт башчы Хан Дак Су аткарууда.
Шерине