Кошмо Штаттардын мамлекеттик катчысы Энтони Блинкен Жакынкы Чыгышты кыдырып жүрүп, күтүүсүздөн Иракка барды. Анын бул сапары Сириядагы кырдаалды турукташтырууга багытталган. Мамкатчы Багдадда Ирактын өкмөт башчысы Мухаммед аль-Судани менен жолукту.
Ушуну менен Блинкен чөлкөмгө былтыр Израил менен ХАМАС (АКШ менен Евробиримдикте террордук деп таанылган) уюмунун ортосунда согуш тутанганы 12-жолу, ал эми Сирияда Башар Асаддын бийлиги кулатылгандан бери биринчи жолу келип жатат.
Ал буга чейин Иордания жана Түркияда болду. Иорданияда ал араб мамлекеттеринин тышкы иштер министрлери менен чукул жыйын өткөрүп, “Ислам мамлекети” террордук тобуна каршы Сириядагы бийлик вакуумунан пайдаланып кетүүгө жол бербеш үчүн бардык чараларды көрүш керек экенин белгиледи.
Блинкендин сапары президент Жо Байдендин администрациясынын иши соңуна чыгайын деп калганда жүрүп жатат. Шайланган президент Дональд Трамп Байдендин Жакынкы Чыгышка карата саясатын сындап, Ирак менен Сирияда америкалык аскерлердин болушуна скептикалык көз карашын билдирип келет.
Сентябрь айында АКШ менен Ирак “Ислам мамлекети” террордук тобуна каршы биргелешкен аскердик операцияларды кийинки жылы соңуна чыгарууну макулдашкан. Анткен менен Асаддын бийлигинин кулатылышына байланыштуу экстремисттик топ кайра баш көтөрсө, аскерлерди чыгаруу оор болуп каларын айрым эксперттер белгилешет.
Шерине