Орусиянын Мамлекеттик думасы орус тил сынагынан өтө албаган мигранттардын балдарын мектепке алууга тыюу салган мыйзам долбоорун биринчи окууда кабыл алды. Бул тууралуу парламенттин төмөнкү палатасынын маалымат кызматы билдирди.
Документке ылайык, чет элдик жарандар окууга анын үй-бүлөсү Орусияда мыйзамдуу жүрөт деген уруксат кагаздар көрсөтүлгөндө жана тил боюнча тесттен өткөндө гана алынат. Орус тилинин деңгээли билим берүү программасын өздөштүрүүгө жетиштүү болууга тийиш.
Сынактын жол-жоболорун аткаруу бийлигинин федералдык органы аныктамакчы.
Мамдуманын басма сөз кызматы окуу жылынын башында өткөрүлгөн мониторингге шилтеме кылып маалымдагандай, мигранттардын балдарынын 41% орус тилинен кыйналган.
"Бала тил билбесе, билим алуу жараяны жана социалдык адаптация татаал болуп, классташтары жана мугалимдер да кыйынчылыктарга туш болот", - деп белгиленет билдирүүдө.
Депутаттар мыйзам долбоорун 11-декабрда карап бүтүүнү көздөшөт. Мыйзам эмки жылдын 1-апрелинде күчүнө кирмекчи.
Орусия президенти Владимир Путин мигранттардын орус тилин билбеген же начар билген балдары менен иштөө алгоритмин даярдоо керектигин билдирген. Ошондой эле ал орус тилин жана Орусия элин колдоо боюнча мамлекеттик саясатты ишке ашыруу мекемесине эмгек мигранттарынын орус тилин билүүсү боюнча талаптарды аныктоону буйруган.
29-ноябрда Кыргызстандын Тышкы иштер министрлигинин Консулдук департаментинин директору Сейтек Жумакадыр уулу Орусияда 334 миңдей кыргызстандык иштеп жүргөнүн «Азаттыкка» билдирген.
Шерине