Мамлекеттик бюджеттен социалдык төлөмдөр үчүн 62,7 млрд сом каралган

2024-жылы мамлекеттик бюджеттен социалдык төлөмдөр үчүн 62,7 млрд сом каралды. Бул тууралуу Финансы министрлиги маалымдады.

Ага ылайык, бул каражат жумушсуздук, оору, майыптык, багуучусун жоготкон үй-бүлөлөргө берилүүчу жөлөк пул, пенсионерлердин пенсиясынан тартып акысыз билим берүүгө сарпталуучу чыгымдарга чейин сарпталат.

Социалдык төлөмдөргө бөлүнүп жаткан быйылкы чыгаша былтыркыдан дээрлик эки эсеге чукул көп, тагыраак айтканда былтыр бул максатта 35,8 млрд сом бөлүнгөн.

Чыгашалардын өсүшү - пенсиянын базалык бөлүгү көбөйүшүнө жана мамлекеттик жөлөк пулдардын жогорулашына байланыштуу болгону кабарланды.

Былтыр 1-октябрдан пенсиянын камсыздандыруу бөлүгү 38% жогорулаган. Социалдык фонд 2024-жылы пенсиялык төлөмдөрдүн камсыздандыруу бөлүгүн 7% көбөйтүү мүмкүнчүлүгүн карап жатканы кабарланган.

Учурда Кыргызстанда пенсиянын орточо көлөмү 9300 сом.

Соцфонддун былтыр 1-ноябрдагы эсебине ылайык, Кыргызстанда 764 миң пенсионер бар. Алардын 400ү 50 миң сомдон көп пенсия алышат. Ал эми эң аз пенсия 1800-2000 сомду түзөт.

Улуттук статистика комитетинин маалыматында, 2023-жылы Кыргызстанда пенсия курагындагылардын жашоо минимуму 6878 сом деп эсептелген.(ZKo)