Кыргызстандын медиа жана жарандык коом өкүлдөрү АКШнын, Швейцариянын, Улуу Британиянын жана Европа өлкөлөрүнүн элчиликтерине кайрылып, «чет элдик өкүл» мыйзамын колдогон депутаттарды жана алардын жакындарын виза жагынан чектөөгө чакырышты.
25-октябрда аталган мыйзам долбоору (“Коммерциялык эмес уюмдар жөнүндө” мыйзамына жана Кылмыш-жаза кодексине өзгөртүү киргизүү тууралуу) Жогорку Кеңеште биринчи окууда кабыл алынды.
Кайрылууда мыйзам долбоорунун демилгечиси Надира Нарматованын, төрага Нурланбек Шакиевдин, Укук тартиби жана кылмыштуулук менен коррупцияга каршы күрөшүү комитетинин төрагасы Сүйүнбек Өмүрзаковдун жана Конституциялык мыйзамдар, мамлекеттик түзүлүш, сот-укук маселелери жана парламенттин регламенти комитетинин төрайымы Чолпон Султанбекованын аты аталды.
Журналисттик иликтөөлөр фондунун аткаруучу директору Гладис Темирчиева «Азаттыкка» билдиргендей, бул кайрылуу аталган мыйзам комитеттерде да, жалпы жыйында да гендердик, укуктук жана башка тийиштүү экспертизалардан өтпөстөн, регламенттин одоно бузулушу менен кабыл алынып жатканына байланыштуу кабыл алынды:
“Кыргыз жарандарынын гана эмес, бул жакта иштеген чет өлкөлүктөрдүн да сөз эркиндигине, пикирин эркин билдирүүгө, чогулууга болгон укугун чектөөчү мыйзамды колдоп жаткан депутаттар аталган мамлекеттерде бизнес ачышына, мүлк сатып алышына, балдарын окууга жөнөтүүгө же өзүлөрү барышына, ал жакта жашашына, эс алышына жол берилбеши керек деп эсептейбиз. Көптөгөн депутаттардын бул өлкөлөрдө бизнеси бар, балдары окушат”.
Мыйзамды депутат Нарматова жазып, былтыр ноябрда коомдук талкууга чыгарган. Башында өзү жалгыз автор болуп көрсөтүлгөн документке дагы 32 депутат демилгечи болуп кошулган. Бирок кийин алардын айрымдары авторлуктан баш тартып, 20сы калган.
Одесса облусунда Либериянын туусу алдында жүрүп бараткан жарандык кеме ракеталык чабуулга кабылып, жабыркады. Бул тууралуу Украинанын Куралдуу күчтөрүнүн «Түштүк» ыкчам башкармалыгы 8-ноябрда билдирди.
Мекеменин маалыматына караганда, ракета кеме портко кирип бараткан учурда тийген – бир украиналык лоцман (деңиздеги багытоочу кызматкер) каза болуп, кеменин экипажынын үч мүчөсү (Филиппин жарандары) жана портто иштеген бир жумушчу жараат алышты.
Украинанын Куралдуу күчтөрүнүн басма сөз кызматы ракета Кара деңизде турган орусиялык тактикалык авиация учагынан атылганын билдирди.
Орусия бул окуяга байланыштуу комментарий бере элек. Согуштун айынан мурдагы керектөөчүлөрүнө дан жана башка азыктарын деңиз аркылуу жеткире албай калган Украина Түркиянын ортомчулугу аркылуу орус бийлиги менен “дан келишимин” түзгөн. Кийин бул келишим иштебей калган. Орусия Кара деңиздеги украиналык портторго жөнөп бараткан кемелер “мыйзамдуу бута” катары каралышы ыктымал экенин эскерткен.
Орусия Украинага 2022-жылдын февралында кол салгандан бери кармаш уланууда.