Бишкек шаардык прокуратурасы “Бишкектин санитардык полигону” ишканасынын мурдагы жетекчиси Болот Асаналиев кармалып, таштанды полигонуна байланыштуу Бишкектин экс-мэри Албек Ибраимовго жана анын Г.А. аттуу кеңешчисине издөө жарыяланганын билдирди.
Маалыматка ылайык, көзөмөл орган “Бишкектин санитардык полигонуна” бөлүнгөн каражаттар боюнча Кылмыш-жаза кодексинин 337-беренеси (“Кызматтык абалынан кыянаттык менен пайдалануу”) менен иш козгоп, тергөө жүргүзүүдө.
Бишкек шаарынын мэри Эмилбек Абдыкадыров 28-апрелде таштанды жайга бөлүнгөн 22 миллион евронун учурда теңи гана калганын, калган жарымы кайда жумшалганын териштирип-иликтөө үчүн Эсептөө палатасы аудит жүргүзүп жатканын маалымдаган.
Бул боюнча “Азаттыктын” иликтөөсү жарыяланган. Анда Бишкекке таштанды төгө турган жаңы полигон куруу жана рекультивация кылуу иштерине деп алынган 22 млн. евронун 6 миллиону гана калганы белгилүү болду. Бирок ушул күнгө чейин акыр-чикир талаасы толук тазаланбай турат. (TSh)
