АКШ президенти Дональд Трамп жекшембиде NBC News телеканалына курган маегинде Орусия- Украина согушун токтотуу боюнча тынчтык келишимине жетерине ишенерин айтты.
Журналист Киев менен Москванын ортосунда келишим жакынбы деп сураганда, Трамп: "Буга үмүт артам" деп жооп берди. Ал кошумчалагандай, "АКШ бул максатка жакындап калды, бирок бир тарап менен жакын, экинчи тарап менен анча жакын эмес", - деди, бирок кайсы өлкө тууралуу сөз болуп жатканын тактаган жок.
Трамп мындай келишимге жетишүү мүмкүн болбой калышы ыктымалдыгын, анткени "жек көрүү өтө күчтүү" экенин белгиледи.
"Бул эки адамдын (ред: - байкалып тургандай, Зеленский менен Путин) бири-бирине жек көрүүсү күч. Ошондой эле айрым аскерлердин, ачык айтканда, генералдардын ортосунда да жек көрүү бар. Алар үч жылдан бери согушуп жатат", - деди Трамп.
Анан Трамптан сүйлөшүүлөрдөн качан баш тартууга аргасыз болосуз деп сурашканда, ал мындай учур "эч нерсе жасай албай турганына көзү жеткенде болорун” айтты.
4-майда NBC News телеканалына чыккан маегинде Трамп үчүнчү мөөнөткө барууга “олуттуу карабай турганын” билдирди. Бирок бара турган болсо "жетиштүү колдоо табарын" белгиледи. .
"Бул мен каалаган нерсе эмес", - деп айтты Трамп журналист Кристен Уэлкер менен болгон маекте.
АКШнын учурдагы президенти төрт жылдык жаңы мөөнөттү “сонун” өткөрүп, андан соң бийликти “идеалында бир республикачылга” тапшырууну каалай турганын айтты.
Вице-президент Жей Ди Вэнс менен мамлекеттик катчы Марко Рубионун ишин мактады. Бирок ал “ыктымал мураскор тууралуу азыр айтууга али эрте” экенин кошумчалады.
Украинанын Коргоо министрлигинин башкы чалгын кызматы 2-майда орусиялык кыргын салуучу Су-30ду Кара деңиздеги экипажы жок "Магура" катерине орнотулган зениттик жабдык менен атып түшүргөнүн билдирди.
Новороссийск портунан анча алыс эмес жерде Орусиянын Кара деңиз флоту жайгашкан. 3-майда украиналык аскерлер Краснодар крайына учкучсуз учактар менен чабуул койгон.
Мекеменин Телеграм-каналына илинген видеодо орусиялык учактын кыйрашы тартылган. Талкаланган учактын баасы 50 млн доллар турат.
Билдирүүдө "бул деңиз дрону менен дүйнөдө аскердик учакты биринчи жолу жок кылуу" экени жазылган. Муну менен катар мекеме 2024-жылы 31-декабрда украиндердин чалгын кызматы орусиялык Ми-8 эки тик учагын деңиз дрону менен талкалаганын эске салган. Орусиялык расмий булактар анда бир гана тик учак жок кылынганын айтышкан.
Орусиянын Коргоо министрлиги бул боюнча маалымат бере элек. Бирок орусиялык аскердик Телеграм-каналдар Су-30 деңиз дрону менен атылганын моюнга алышты. "Рыбарь" Телеграм-каналы кыргын салуучу учак Новороссийскиден 50 чакырым алыс жерде атылганын жазды. Алардын билдиришинче, экипаж өзүн куткарууга жетишип, аларды жарандык суучулдар куткарып калган. Украинаны жактаган "Крым шамалы" каналы учкучтарды Панаманын желеги менен жүргөн "Виктория Форчун" кемеси куткарып калганын билдирди.
Киев 4-майга караган түнү орусиялык дрондордун чабуулуна кабылды. Украин борборунун үч районунда - Оболонь, Святошин жана Шевченковдо үйлөр кыйрап, өрт чыкты. Мамлекеттик кызматтардын акыркы маалыматында 11 адам, анын ичинде эки бала жабыр тартты.
Оболонск районунда учкучсуз учак тийген үйдүн 12-кабатында өрт чыкты. Андан тышкары Киевде жеке үйлөр жана автомобилдер өрттөндү. Dream Town соода үйүнө зыян келтирилди.
Учкучсуз учактардын чабуулуна Черкассы шаары дагы кабылды. Бийликтердин маалыматында шаарда беш өрт чыгып, анын ичинде жеке турак үй да күйүп кетти. Кампага зыян келтирилип, бир адам жабыркады.
Украинанын аскер аба күчтөр орусиялыктар учурган 165 дрондун жарымы атып түшүрүлдү, жарымы бутага тийбей калган.
Харьков облусундагы аткылоо жана авиасоккунун натыйжасында бир адам каза тапкан. Дагы үчөө Донецк жана Запорожье облусунда каза тапкан. Орусиялык аскерлер кырдаал тууралуу маалымат бере элек.
Украинанын президенти Владимир Зеленский Орусиянын лидери Владимира Путиндин Жеңиш майрамын белгилөөгө байланыштуу үч күнгө жарашуу сунушун четке какты.
Зеленский Путиндин идеясын "изоляциядан чыгууга атмосфера" түзүү үчүн "театралдык оюн" деп атады. Украинанын президенти ок атышууну 30 күнгө токтотууну талап кылууда.
"Ок атышууну талап койбой токтотуу америкалыктар сунуштаган үлгү. Биз ошону кармануудабыз. Ушул датабы же башкабы эрте болгону жакшы. Эмнеге 30 күнгө токтотуу керек? Анткени үч, беш, жети күндө бир нерсени макулдашуу мүмкүн эмес", - деген Зеленскийдин сөзүн "Интерфакс-Украина" жарыялады.
Украин лидери журналисттерге АКШ президенти Дональд Трамп менен Ватиканда жолукканын да айтып берген. "Биздин командабыздын урматына айтып коеюн, менин көз карашымда тет-а-тет форматы иштеди. Бизде бул сүйлөшүү үчүн туура атмосфера болду", - деген Зеленский. Анын айтымында, бул жолугушуудан кийин Трамп ага "саал башкача карай баштаган".
Зеленский менен Трамп 26-апрелде Рим папасы Францискти акыркы сапарга узатуу үчүн барганда сүйлөшкөн. Бул лидерлердин 28-февралдагы Ак үйдөгү кайым айтышуусунан кийинки биринчи жолугушуу болгон.
Зеленский менен Ватиканда жолуккандан кийин Трамп орус президенти Владимир Путинди ок атышууну токтоткусу келбегени үчүн сындаган.