Кыргызстан ушул убакытка чейин автожолдорду куруу үчүн эл аралык каржы уюмдарынан 2 миллиард 540 миллион доллар насыя алган. Бул тууралуу транспорт жана коммуникациялар министринин орун басары Нурланбек Кайынбаев Жогорку Кеңештин 14-июлдагы жыйынында айтты.
Парламент депутаттары жол тармагына алынган насыялар өзүн актабай, жол салууда коррупция тыйылбай келатканын сынга алышты.
Кыргызстанда үчүнчү категориядагы бир чакырым автожолду реконструкциялоого 400-600 миң доллар, экинчи категориядагы жолго 1 - 1,5 миллион доллар кетет. Бир чакырым жаңы жолду курууга татаалдыгына жараша 2 миллион доллардан ашык каражат сарпталат.
Кыргызстан негизги жолдорду курууга насыянын басымдуу бөлүгүн Кытайдан алган.
Өлкөдө Транспорт министрлиги эң коррупцияланышкан мамлекеттик органдардын бири катары бааланып келет. 2019-жылы транспорт жана жолдор министринин ошол кездеги орун басары Азимкан Жусубалиев 500 миң доллар пара талап кылган деп 14 жылга абакка кесилген.
Ушул тапта убактылуу депутаттык комиссия түндүк-түштүк альтернативдүү жолунун курулушун иликтеп жатат.
30-апрелге карата мамлекеттин жалпы карызы (ички жана тышкы карыз) 4 миллиард 933,6 миллион долларга жетти. Анын ичинен 4 миллиард 182,95 миллион доллар тышкы, 750,11 миллион доллар ички карыз. Каражаттын көбү энергетика жана жол тармагына алынган. (BTo)
