Орусиянын президенти Владимир Путин орусиялык жарандарга жана юридикалык жактарга дүйнөнүн кайсы гана жагында болбосун, Орусия "ылайыксыз" же "ыңгайсыз" деп тапкан бейөкмөт уюмдардын ишмердигине аралашууга тыюу салган мыйзамга кол койду.
Документ укуктук маалыматтар порталына жарыяланды.
Мыйзам быйыл 1-октябрдан тарта белгилүү бир өлкөлөрдөн Орусияга жиберилчү акча которууларга да көзөмөл жүргүзүүнү карайт.
Андай өлкөлөрдүн тизмесин Росфинмониторинг мекемеси аныктап, көзөмөл тартиби тууралуу маалыматтар Орусиядагы бардык коммерциялык банктарга жөнөтүлөт.
Июнь айынын башында Мамдума Орусияда «ыңгайсыз» деп табылган эл аралык бейөкмөт уюмдарга финансалык кызмат көрсөтүү же алар үчүн каражат топтоо үчүн кылмыш жоопкерчилигин караган мыйзам долбоорун киргизген.
Бул үчүн мажбурлоо жолу менен 360 саат жумушка тартуу же төрт жылга чейин эркин жүрүүсүн чектөө же эки жылга эркинен ажыратуу сыяктуу жаза чараларын чегерүү каралган. Мындай иш-аракеттер кайталанса, анда 10 жылга чейин эркиндигин чектөөгө байланыштуу жаза бекитилген.
