Жалал-Абадда кафе-ресторандардын ээлери жана өнөрпоздор той-аштарга, маарекелерге киргизилген чектөөлөрдү алып салууну суранышууда. Пандемиядан улам алар каржылык тартыштыкка кириптер болгонун, башка киреше булактары жок экенин айтып жатышат.
Бийликке өтүнүчтөрүн жеткирүү максатында алар 21-сентябрда басма сөз жыйын өткөрүштү.
Кыргыз өкмөтү коронавирустун экинчи толкуну болот деген кооптонуудан улам той-топурга азыраак киши чогултуп, салтанаттарды чектөөнү талап кылып келатат. Ресторан-кафелерге той-аш өткөрүүгө, жапырт иш-чараларга тыюу салынган. Талапты аткарбаган юридикалык жактарга 13 миң, жеке адамдарга үч миң сом айыппул салынары белгиленген.
21-сентябрда өкмөт башчы Кубатбек Боронов коомдук жайларда милдеттүү түрдө беткап кийиш керек экенгин айтып, ага көзөмөл жүргүзүүнү тийиштүү органдарга тапшырды. Жалал-Абад шаарында 25 тойкана, 161 коомдук тамактануучу жай бар.
Кыргызстанда COVID-19 вирусуна чалдыккандардын жалпы саны 45471 кишиге жетти. Алардын 41 682си сакайып, 1063ү жашоо менен кош айтышты. Илдет соңку бир суткада 55 кишиден табылды. (TB\SE)
