Мурдагы вице-премьер-министр Дүйшөнбек Зилалиевдин иши боюнча соттук отурум 11-сентябрда уланат. Бул тууралуу иш каралып жаткан Бишкектин Биринчи май райондук сотунун басма сөз кызматы билдирди.
Мекеме тараткан маалыматка ылайык, 7-сентябрдагы жараянда күбө Кутманов суракка алынды. Түштөнүү убактысы болуп калгандыгына байланыштуу сот саат 14:30га чейин тыныгуу жарыялаган. Белгиленген убакытка айыпталуучунун адвокаттары келбегендиктен соттук отурум 11-сентябрга жылдырылды.
Башкы прокуратура Дүйшөнбек Зилалиевге 2010-2017-жылдары мамлекеттик органдарда жетекчилик кызматты ээлеп турганда өзү иштеп тапкан каражаттан ашык суммага мүлк сатып алган деген жүйө менен «Мыйзамсыз баюу» беренесинин негизинде кылмыш ишин козгогон.
Ал 2018-жылдын 8-декабрында камакка алынып, азыр Улуттук коопсуздук боюнча мамлекеттик комитеттин (УКМК) тергөө абагында отурат. Зилалиев айыптарды четке кагып, «мыйзамсыз түрдө камалганын» айтып келет. (BTo)
