Президент Сооронбай Жээнбеков Кыргызстан менен Тажикстандын ортосундагы чек ара маселелерин чечүү иштери оор болуп жатканын билдирди. Бул тууралуу ал 25-декабрда Бишкекте өткөн жылдык пресс-конференцияда айтып, сүйлөшүүлөр аягына чыга электигин белгиледи.
- Алмашчу жерлерди алмашалы, чек араны чечили, эл менен кеңешели деп жатабыз. Чек ара маселесине этият мамиле кылышыбыз керек. Мен бул боюнча күндө иштейм. Ачыгын айтканда, минада отургандай эле болуп жатабыз,- деген Жээнбеков дээрлик күнүгө кыргыз-тажик чек арасында абалды ойлоп тынчсызданарын кошумчалады.
Эки өлкө ортосундагы такталбаган жерлерде кыргызстандык жана тажикстандык жарандардын жаңжалы көп катталууда.
Кыргызстандын президенти Сооронбай Жээнбеков менен Тажикстандын мамлекет башчысы Эмомали Рахмон 28-ноябрдагы жолугушууда кыргыз-тажик мамлекеттик чек арасын делимитациялоо жана демаркациялоо боюнча кызматташтыкты бекемдөө туурасында сүйлөшкөн.
