Украин бийликтери орусиялык мурдагы депутат Денис Вороненковдун киши колдуу болушуна байланыштуу бир нече шектүү адам кармалганын билдиришти.
16-июндагы билдирүүдө Улуттук полиция “тергөө амалдарын” Павлодар шаарында жүргүзгөнү айтылат. Полиция канча киши кармалганын жана алардын аты-жөнүн атаган жок. Мамлекеттик Думанын мурдагы мүчөсү Вороненков Украинага качып, президент Владимир Путинди сындап келген. Аны 23-мартта Киевде атып өлтүрүшкөн.
Полиция шектүү киллер - Паршов аттуу 28 жаштагы украин жараны Орусиянын жашыруун агенти болчу деп билдирген.
Ал Вороненковдун жансакчысы аткан октон жарадар болуп, ооруканада каза тапкан. Украин президенти Петро Порошенко экс-депутаттын өлтүрүлүшүн “Орусиянын мамлекеттик террорчулугу” деп атаган.
