Ооганстандын түндүгүндө Түркмөнстан менен чектешкен Фарияб провинциясында согушкерлер үч түркмөн чек арачысын өлтүрүшкөнү кабарланууда. “Азаттыктын” түркмөн кызматына бүгүн сүйлөгөн Гормач районунун акими Асал Хан түркмөн чек ара бекетине чабуул 24-майда болгонун айтты. Окуянын чоо-жайы белгисиз. Түркмөн расмий бийликтери инцидентти тастыктай элек. Талибан да бул чабуул тууралуу билдирүү таратканы билинбейт. Мартта да Ооганстандын түндүктөгү бир провинциясы - Багдисте - талиптер үч түркмөн чек арачысын өлтүрүшкөнүн жергиликтүү бийликтер айтышкан.
