Азаттық тілшісі кинокартинаның тең продюсері Сёдзо Ичияма (Жапония) және Юлия Киммен (Қазақстан) кездесті. Сёдзо Ичияма 1989 жылдан бері жиырма шақты фильмге продюсер болған. Оның біріншісі – "Қатыгез полицей" (режиссері – Такеши Китано). Кейін өзге де танымал кинорежиссерлермен, атап айтқанда Самира Махмальбафпен (Иран), Хоу Сяосянмен (Қытай), көбіне Цзя Чжанкэмен (Қытай) бірге жұмыс істеген.
ҚАЗАҚСТАНДЫҚ КИНОМЕН ТАНЫС
Жапон продюсерімен әңгіме кезінде режиссер Ерлан Нұрмұхамбетовпен Ичияманың бірінші сырттай танысқанын білдік – 2011 жылы Алматыда "Еуразия" халықаралық кинофестивалі кезінде "Найзағай алдында" атты фильмін көріп, картина оған ұнапты. Фильм сол кезде гран-при ұтып алған еді. Сёдзо Ичияманың айтуынша, фильмнің тең режиссері, қосалқы авторы әрі тең продюсері Сано Синдзю – оның досы.
Қазақстандық кинематограф туралы Сёдзо Ичияма өте жақсы пікір білдіріп, мәдени тұрғыда қазақ фильмдері өте бай, толымды деп баға береді. Оған қазақстандық бірінші толқын (90-жылдар) фильмдері ұнайды екен, жаңа толқын режиссерлері де қалыспайды дейді ол. Сёдзо Ичияма – Токиодағы Tokyo Filmex халықаралық кинофестивалінің тең құрылтайшысы, оған қазақстандық режиссерлер Әмір Байғазин мен Дәрежан Өмірбаевтар қатысқан еді.
"БАРЫМТАШЫЛАР" БІРЛЕСКЕН ЖОБАСЫ ТУРАЛЫ
Ерлан Нұрмұхамбетовтің бірінші фильмінен оң әсер алған және жаңа киножобасы да ұнаған Сёдзо Ичияма "Барымташылар" фильмін жасауға келіскен. Ынтымақтастық туралы келісім биыл мамырда Канн кинофестивалінде жасалған.
Тең продюсерлерден "Барымташылар" фильмі не туралы екенін сұрадық.
– Басында тоқсаныншы жылдар туралы кино түсіргіміз келген еді, кейін қазіргі уақытқа ауыстық. Онда үлкен қаладан алыста тұратын адамдардың тағдыры баяндалады. Отағасы дүние салған соң отбасының әр мүшесі өмірдегі жаңа жағдайға икемделеді. Экшн элементтері бар драма болмақ. Басында фильмді авторлық (арт-хаус) етіп жасасақ дегенбіз. Кейін талқылау кезінде көрермендерге түсінікті болсын деп коммерциялық кино элементтерін қосуды ұйғардық. Сондықтан "Барымташылар" авторлық және коммерциялық киноның қоспасы болмақ, - дейді ол.
Сёдзо Ичияма қазақстандық оқиғаны баяндағанымен, басты кейіпкерлердің сезімін жапон көрермені де түсінеді дейді. Отағасынан айрылу проблемасы жапондарға да таныс. Жапонияда жер сілкінісі не басқа жағдайдан отағасы дүние салғанда отбасының онсыз өмір сүруге мәжбүр болатын кезі кездеседі.
ЖҰЛДЫЗДЫ АКТЕРЛЕР ҚҰРАМЫ
Басты рөлді кімдер сомдайтыны қазірден белгілі. Олар – жақында Канн кинофестивалінде үздік актриса сыйлығын алған қазақстандық Самал Еслямова, театр және кино актері Дулыға Ақмолда мен жапон актері Мирай Морияма.
Жапон актері отыздан астам фильмде ойнаған. Ол Жапонияға жақсы таныс актер әрі биші. Юлия Кимнің айтуынша, "Барымташыларда" Мирай Морияма қазақтың рөлін ойнайды. Сол үшін бұрыннан қазақша репликаларды жаттап жүр, сөзді дұрыс айту үшін қазақ тілі мұғалімімен айналысады. Сондай-ақ атқа міну өнерін де үйреніп жүр. Актердің тіл меңгеру қабілеті күмән тудырмайды.
Университетте лингвистика курсында ол ағылшын және испан тілдерін меңгерген, Бельгия мен Израильде тұрғанда сол жақтың тілін игерген. Туындыда қазақстандық оқиға баяндалатындықтан және түсірілімдер де осында болатындықтан, бюджеттің басым бөлігін Қазақстан тарабы көтереді.
Бұл жобаға "Қазақфильм" киностудиясы қызығушылық танытқан, мемлекеттік қаржыландыру сол арқылы жүреді. Келер жылы "Барымташылар" фильмі кинофестивальдерден көрінуі мүмкін.
ПІКІРЛЕР