Өзбекстан Сыртқы істер министрлігі ресми сайтында "Талибан" қозғалысының жоғары шенді өкілдерімен жұмыс бабында байланыс орнатып, кездесу өткізгені туралы хабарлады.
Кездесудің қашан және қай жерде өткені туралы еш ақпарат айтылмайды. Министрлік мәліметінше, кездесу биыл 27 наурызда Ташкентте өткен Ауғанстан жөніндегі конференцияда жасалған келісім негізінде ұйымдастырылған.
Осы келісім аясында Өзбекстан жағы Ауғанстан үкіметімен, АҚШ, Қытай, Ресей және Халықаралық байланыс тобы елдері, Оңтүстік Азия, Таяу Шығыс мемлекеттерінің өкілдерімен кеңесіп, келіссөз өткізген.
Сыртқы істер министрлігі Ауғанстан үкіметі мен "Талибан" арасында мұсылмандардың Ораза айт мейрамы кезінде өзара бітім орнату режимін енгізгенін құптайды. Өзбекстан бұл бітім Ауғанстан президенті Ашраф Ғанидің қақтығысты тоқтату режимін ұзартқанына байланысты ұзақ уақытқа созылады деп үміттенеді.
Алайда, Ораза айт аяқталмай жатып "Талибан" өкілдері Ауғанстан үкіметі ұсынған қақтығысты тоқтату режимін ұзартудан бас тартқан.
ПІКІРЛЕР