101 մարդու վիրավորման պատճառ դարձած ոստիկանության երեկվա գործողությունից ժամեր անց վարչապետ խորհրդարանի ամբիոնից այսօր պնդեց, թե ոստիկանության հակազդեցությունը եղել է «իրավաչափ և պրոֆեսիոնալ»։
Նա մեղադրեց ցուցարարներին, ոստիկանության պատը ճեղքելու համար՝ պնդելով՝ «որպեսզի հարձակում գործեն խորհրդարանի վրա»: Իսկ ոստիկանությունը, ըստ գործադիրի ղեկավարի, պաշտպանել է օրենսդիր ինստիտուտը:
Փաշինյանը նաև տվյալներ ներկայացրեց՝ նշելով, որ տուժել է 18 ոստիկան և 83 քաղաքացի, բոլոր վնասվածքները եղել են թեթև և միջին ծանրության, այս պահին հոսպիտալացված է 16 անձ:
«Երեկ այս դահլիճում ինձ նկար էին ցույց տալիս ու փորձում համոզել, որ քաղաքացու ձեռք է պոկվել, մինչդեռ ակնհայտ է, որ նման բան չկա: Քաղաքացին վիրահատվել է, և նրա ձեռքի մատներից 3 հեռացվել են, ինչի համար ցավում եմ», - ասաց Փաշինյանը։
Վարչապետը նաև պնդեց՝ ըստ կարդրերի, քաղաքացին ինքն է վերցրել հատուկ միջոցը գետնից, «այսինքն՝ եթե չվերցներ, դա տեղի չէր ունենա»:
Վարչապետը նաև հայտարարեց՝ տեղի ունեցած զանգվածային անկարգությունների սադրիչները պետք է պատասխանատվության ենթարկվեն: «Մենք չենք եղել և չենք լինի թույլ իշխանություն», - ասաց գործադիրի ղեկավարը։
Երեկ խորհրդարանի մոտ վարչապետի հրաժարականը պահանջող «Տավուշը հանուն հայրենիքի» շարժման մասնակիցների և ոստիկանների միջև բախումներ եղան, ոստիկանությունը հատուկ միջոց՝ լուսաձայնային նռնակներ կիրառեց։
Առողջապահության նախարարության վերջին տվյալներով՝ 101 քաղաքացիական անձ է դիմել բուժօգնության, այսօր առավոտյան 85-ը դուրս է գրվել։ ՆԳՆ-ն էլ հաղորդել էր վիրավորված 16 ոստիկանի մասին։ Հատուկ միջոցներից տուժածների թվում նաև ԶԼՄ ներկայացուցիչներ կան։
Շարժումն առաջնորդող Բագրատ սրբազանը ոստիկանական գործողությունները որակել է «ահաբեկչություն» խաղաղ հավաքի մասնակիցների, ինչպես նաև ԱԺ հարևանությամբ գտնվող այգում եղած քաղաքացիների նկատմամբ։
