Ազգային ժողովում այսօր իշխանությունն ու ընդդիմությունը միմյանց էին մեղադրում «Հանրապետական» կուսակցության հետ կապ ունենալու համար:
Նախ ամբիոնից ելույթ ունենալիս ԱԺ փոխնախագահ Վահագն Ալեքսանյանը դիմելով «Ուժեղ Հայաստանին» ասաց, որ նոր «Հանրապետական» կուսակցություն են, այնուհետև հերթով թվեց, թե ընդդիմադիր պատգամավորներից ով երբ է «Հանրապետական» կուսակցության հետ կապ ունեցել.
«Պարոն Կարապետյան, Ձեր հայրը «Հանրապետական» ֆրակցիայի ղեկավար էր, հետո Սերժ Սարգսյանի աշխատակազմի ղեկավարը, պարոն Դարբինյանի հայրը Վանաձորի նախկին համայնքապետն է, պարոն Թամրազյանը, կարծեմ, «Հանրապետական» կուսակցության հետ կապ ունեցել է, տիկին Սյուզաննա Ավետիսյանը, կարծեմ, նախկինում «Հանրապետական» եղել է, պարոն Հարություն Մնացականյանը հայտնի «Հանրապետական» կուսակցության անդամ է, պարոն Էդգար Ղազարյանը երևի աշխարհի ամենահայտնի «Հանրապետականն» է, պարոն Անուշավան Մանուչարյանի հայրը Բերդ համայնքի նախկին ղեկավարն է, Շիրազ Մանուկյանը «Հանրապետականի» երիտթևի նախկին անդամ է, դե պարոն Մամիկոն Ասլանյանին բոլորդ էլ գիտեք, «Հանրապետական» կուսակցության անդամ, խորհրդի անդամ և, իհարկե, պարոն Վարդևանյանը, միանշանակ»,- նշեց «Քաղաքացիական պայմանագրից» Վահագն Ալեքսանյանը՝ շարունակելով.
«Հարգելի գործընկերներ ֆրակցիայի կեսից շատի անունը տվեցի՞: Հետևաբար, դուք «Հանրապետական» կուսակցությունն եք, դրա նոր ներկայացումն եք: Ասում եք՝ նոր ուժ եք: Շատ լավ, դուք նոր «Հանրապետական» ուժ եք»:
«Ուժեղ Հայաստանից» Էդգար Ղազարյանը ՔՊ խմբակցության շարքերից մատնանշեց Ահարոն Սահակյանին: Վերջինս Կոտայքի մարզպետի պաշտոնն էր զբաղեցնում, այս տարվա հուլիսի վերջ դադարեցվեցին լիազորությունները:
Լրագրողների հետ զրույցում Ահարոն Սահակյանն ասաց. «Էն ժամանակ «Հանրապետականի» ֆրակցիայով եմ առաջադրվել համայնքապետ», բայց կուսակցական չեմ եղել»:
Էդգար Ղազարյանն էլ իշխանականներին հակադարձեց. «Սասուն Միքայելյան՝ ՀՀԿ խորհրդի անդամ: Անդրանիկ Քոչարյանը եղել է Վազգեն Սարգսյանի օգնական: Վազգեն Սարգսյանը «Հանրապետական» կուսակցության պատմության մեջ ամենամեծ դերակատարում ունեցած առաջնորդներից մեկն էր: Կնյազ Հասանովը. 2017-ին ՀՀԿ համամասնական ցուցակով ընտրվել է ԱԺ պատգամավոր: Ծովինար Վարդանյանի հայրը եղել է Շրջակա միջավայրի նախարար, Պաշտպանության նախարարի տեղակալ: Սերգեյ Բագրատյան. ՀՀԿ-ի պաշտոնավարման շրջանում որպես կոալիցիոն գործընկեր ԲՀԿ-ի կողմից նշանակվել է Վայոց Ձորի մարզպետ...ՔՊ խմբակցության 11 տոկոսը ուղիղ կապ ունի ՀՀԿ-ի հետ»:»։
Կուսակցականների թեմային ԱԺ ամբիոնից իր ելույթում անդրադարձավ նաև «Հայաստան» խմբակցությունից Արթուր Խաչատրյանը, ասաց.- «Հետ եմ նայում, պարոն Կոնջորյան՝ երկու կուսակցություն...ուրեմն՝ ՔՊ-ի նախագահի մի տեղակալը նախկին «Հանրապետական է», մյուսը՝ նախկին ԲՀԿ-ական է...»:
ԱԺ իշխանական փոխնախագահ Հայկ Կոնջորյանը Էդմոն Մարուքյանի գլխավորած «Լուսավոր Հայաստան»-ի անդամ է եղել: «Քաղաքացիական պայմանագիր» կուսակցության վարչության փոխնախագահ Գևորգ Պապոյանը նախկինում անդամակցել է ՀՀԿ-ին:
ՔՊ-ական փոխնախագահ Վահագն Ալեքսանյանը պնդեց՝ ինքը ՔՊ-ից բացի ոչ մի այլ կուսակցության անդամ չի եղել:
Ավելի ուշ ԲՀԿ խոսնակ Իվետա Տոնոյանն «Ազատությանն» ասաց՝ Ալեքսանյանը «ակտիվորեն ներգրավված է եղել ԲՀԿ երիտթևի աշխատանքներում»:
«Տարեթվերին չեմ տիրապետում անկեղծորեն, և այս պահին էլ կուսակցության գրասենյակը չի գործում ու արխիվները ստուգելու հնարավորություն չունեմ, բայց կարծում եմ, որ Վահագն Ալեքսանյանը իր անցյալը ջնջելու անհաջող փորձեր է անում: Ես հասկանում եմ, որ իր համար թերևս կյանքը սկսվում է 2018 թվականի հեղափոխությունից հետո, բայց ԲՀԿ երիտթևի հետ կապված բազմաթիվ ֆոտո, վիդեո նյութեր կան արխիվներում, շատ ակտիվ գործունեություն է ծավալել», - ասաց Տոնոյանը:
