Վրաստանի վարչապետ Իրակլի Կոբախիձեն աշխատանքային այցով այսօր ժամանել է Ադրբեջան։
Ադրբեջանական լրատվամիջոցները նշում են, որ վրաստանի վարչապետին օդանավակայանում դիմավորել է փոխվարչապետ Սամիր Շարիֆովը։
Ըստ վրացական կողմի՝ Կոբախիձեն առանձին հանդիպումներ կունենա Ադրբեջանի նախագահ Իլհամ Ալիևի և վարչապետ Ալի Ասադովի հետ։ Երկու երկրների վարչապետերի գլխավորությամբ կանցկացվի Վրաստանի և Ադրբեջանի միջև տնտեսական համագործակցության միջկառավարական հանձնաժողովի 10-րդ նիստը։
«Վրացական երազանք»-ի պատգամավոր Գիվի Միկանաձեն, ավելի վաղ խոսելով վարչապետ Կոբախիձեի Բաքու նախատեսված այցից, նշել էր, որ հարևան երկրի իշխանությունների հետ Վրաստանի ղեկավարը մտադիր է քննարկել «երկկողմ նոր նախագծերի մեկնարկը»։
«Ամենակարևոր նախագիծը Անակլիայի նավահանգստում խորջրյա տերմինալի կառուցումն է, որը բեռնափոխադրման շատ ավելի մեծ ներուժ կունենա։ Այնտեղ կկարողանան մտնել ավելի մեծ նավեր։ Այդ իսկ պատճառով կարևոր է, որ այս համագործակցությունն աջակցվի բոլոր մակարդակներում», - հայտարարել էր վրաց պատգամավորը։
Նախօրեին էլ Բաքու էր ժամանել Վրաստանի արտգործնախարար Մակա Բոչորիշվիլին։ Սա այդ պաշտոնում Բոչորիշվիլիի առաջին արտասհմանյան ուղևորությունն էր։ Բոչորիշվիլին հանդիպել է ադրբեջանցի իր գործընկերոջ հետ։
