Այսօր վաղ առավոտից Քննչական կոմիտեն ձերբակալում է հունիսի 12-ին Բաղրամյան պողոտայում վարչապետի հրաժարականը պահանջող ընդդիմադիրների նախաձեռնած հանրահավաքի մասնակիցներին։
Քննչականից «Ազատության»-ը միայն փոխանցեցին, որ ձերբակալություններն իրականացվում են խուլիգանություն հոդվածի շրջանակում։
«Ազատությա»-ն հետ զրույցում ընդդիմադիրների փաստաբան Ռուբեն Մելիքյանը հայտնեց առնվազն երկուսի մասին, որոնց քննչականն արդեն մեղադրանք է առաջադրել խմբակային խուլիգանության հոդվածով։ Մելիքյանի տվյալներով՝ առնվազն 10 ձերբակալության մասին տեղեկություններ են ստացել։
Առավոտյան ձերբակալված, ապա ազատ արձակված 73-ամյա մեղադրյալ Տիգրան Սարիբեկյանի փաստաբանն ընդգծեց՝ պաշտպանյալը մեղքը չի ընդունում, իրավապահներն իրենց են ներկայացրել մի տեսագրություն, որտեղ տարեց տղամարդը նռնակի պայթյունից շփոթվում է, կռանում է, ինչ-որ իր է վերցնում ու նետում։
Ռուբեն Մելիքյանի խոսքով՝ հենց այս դրվագն է Քննչականը որակել խուլիգանություն, այն էլ խմբակային, այնինչ այդ արարքով ծերունին ոչ մեկին չի վնասել։ Ավելին, ըստ փաստաբանի, նռնակից ծերունու ականջն է վնասվել։
Քննչականը դիմել է դատարան՝ Սարիբեկյանին տնային կալանքի ենթարկելու համար։
Իրավապահներն ընդգծում են, որ ամեն ինչ անում են բացառապես օրենքի սահմաններում։
Հունիսի 12-ին խորհրդարանի մոտ վարչապետի հրաժարականը պահանջող «Տավուշը հանուն հայրենիքի» շարժման մասնակիցների և ոստիկանների միջև բախումներ եղան, ոստիկանությունը հատուկ միջոց՝ լուսաձայնային նռնակներ կիրառեց։ Հարյուրից ավելի մարդ բերման ենթարկվեց, մոտ այդքան էլ տուժած կա։
Շարժումն առաջնորդող Բագրատ սրբազանը ոստիկանական գործողությունները որակել է «ահաբեկչություն» խաղաղ հավաքի մասնակիցների, ինչպես նաև ԱԺ հարևանությամբ գտնվող այգում եղած քաղաքացիների նկատմամբ։ Ըստ վարչապետ Նիկոլ Փաշինյանի՝ ոստիկանության հակազդեցությունը եղել է «իրավաչափ և պրոֆեսիոնալ»։
