Հազարավոր ուկրաինացի զինվորներ օգոստոսին գրավել էին Ռուսաստանի արևմտյան Կուրսկի շրջանի մոտ 1300 քառակուսի կիլոմետր տարածք:
Ավելի ուշ Կիևը պնդեց՝ դա դիտարկում է որպես սակարկման թեմա ապագա բանակցությունների համար, երբ բանակցությունների սեղանին կդրվի արևելյան Ուկրաինայի ճակատային գծից ռուսական զորքերը հեռացնելու հարցը:
Սակայն այսօր՝ ռուսական տարածքները գրավելուց յոթ ամիս անց, Ուկրաինան արագորեն զիջում է դիրքերը ռուսական ուժերին, որոնց աջակցում են դաշնակից Հյուսիսային Կորեայի զորքերը:
«Տպավորություն է, որ Ուկրաինայի զինված ուժերը հիմնականում պատրաստ են լքել Կուրսկի շրջանը», - «Ազատություն» ռադիոկայանին ասել է անկախ ռազմական վերլուծաբան Յան Մատվեևը։
Փորձագետները նշում են, որ Ուկրաինայի վերահսկողությունը Կուրսկում թուլացել է ավելի, քան երբևէ օգոստոսից ի վեր:
Կիևը դեռևս վերահսկում է Սուջայի մեծ մասը, սակայն տեղից ստացվող հաղորդումները վկայում են, որ ռուսական ուժերը վերջին օրերին ճեղքել են քաղաքից հյուսիս գտնվող պաշտպանական գծերը:
Ըստ տեղեկությունների՝ ռուս զինվորները Սուջա են սողոսկել չշահագործվող ստորգետնյա գազատարով՝ գաղտնի ներթափանցելով ուկրաինական դիրքեր:
9-ը մարտի, 2025թ.
4-ը մարտի, 2025թ.
24-ը փետրվարի, 2025թ.
Վերջին օրերին Ռուսաստանը նաև առաջխաղացման է գնացել և նոր բնակավայրեր գրավել Ուկրաինայի սահմանի երկայնքով՝ մի քանի հատվածներում:
Արդյունքում, ռուսական ուժերն այժմ կանգնած են ուկրաինական N07 մայրուղուց հինգ կիլոմետր հեռավորության վրա, որն ուկրինական զորքերին մատարակարարումներ ապահովող հիմնական ճանապարհն է։ Վերահսկելով այս ճանապարհը՝ ռուսները լրջորեն բարդացնում են ուկրաինական զորքերի և տեխնիկայի տեղաշարժը:
«Հակառակորդը փորձում է կտրել մատակարարման հիմնական ուղիները... ներկայիս եղանակը խոչընդոտում է մատակարարման երկրորդային ուղիների ստեղծմանը․ մեքենաները խրվում են ցեխի մեջ», - «Ազատություն» ռադիոկայանին ասել է Ուկրաինայի 104-րդ տարածքային պաշտպանության բրիգադի հրամանատար Անտոն Սերբինը:
Ռազմական վերլուծաբան Մատվեևն էլ փաստել է, որ ուկրաինացիների վիճակը բարդացել է հատկապես ռուսների վերջին՝ անօդաչու սարքերի ուժեղացված հարձակումներից հետո»:
Կուրսկը կորցնելը հարված կլինի Ուկրաինայի համար՝ խաղաղություն հաստատելու՝ ԱՄՆ նախագահի սկսած բանակցություններից առաջ: