«Տվյալ անձինք ենթարկվել են բժշկական զննության, այս պահի դրությամբ որևէ հայտնաբերված վնասվածքով անձ մենք չունենք». - մինչ արդարադատության նախարար Սրբուհի Գալյանը երեկ երեկոյան պնդում էր, թե Նուբարաշենի բանտում տեղի ունեցածից վնասվածք ստացածներ չկան, Մարդու իրավունքների պաշտպանը հակառակի մասին է հայտնում.
«Պաշտպանի աշխատակազմի ներկայացուցիչների կողմից արձանագրվել են ազատությունից զրկված անձանց մարմնական վնասվածքները», - երեկվա այցից հետո այսօր հայտնեցին Պաշտպանի գրասենյակից:
Քրեակատարողական ծառայությունը երեկ հայտնել էր, որ ֆիզիկական ուժ են գործադրել, որովհետև դատապարտյալներից մեկը սրել էր իրավիճակը, ներկայացրել անօրինական պահանջներ, օրինակ՝ մշտապես բաց պահել կերակրադռնակը, օրենքով հատկացված զբոսանքի ժամանակը երկարացնել և այլն: Նաև նույն դատապարտյալի դրդմամբ մյուսները զբոսանքի ժամին բարձր երգել են՝ խանգարելով ուրիշներին:
Իրենք էլ քրեական ենթամշակույթի դեմ պայքարի շրջանակներում որոշել են պառակտում հրահրող դատապարտյալին տեղափոխել այլ բանտ: Դրանից հետո որոշ կալանավորներ ու դատապարտյալներ այրել էին ներքնակները, վնասել խցերի գույքը, հարվածել դռներին:
«Ընդամենը ստանդարտ գործողություն խցերի խուզարկության հետ կապված, և դատապարտյալները փորձել են բողոքի ակցիա իրականացնել ոչ իրավաչափ մեթոդներով՝ այրել են գույքը խցի, որի իրավունքը նրանք չունեն, որին հետևել է համապատասխան վերաբերմունքը լիազորությունների շրջանակներում: Այսինքն՝ որևէ լիազորության վերազանցում այս պահի դրությամբ չկա ֆիքսված», - ասաց Գալյանը:
Մարդու իրավունքների պաշտպան Անահիտ Մանասյանի խոսնակն այսօր «Ազատությանը» փոխանցեց բանտարկյալների պատմածը: Ըստ այդմ, Քրեակատարողական ծառայության հատուկ նշանակության բաժնի ծառայողներն իրենց նկատմամբ անհամաչափ ուժ են կիրառել, կոտրել են խցերի գույքը, վիրավորանքներ և հայհոյանքներ հնչեցրել իրենց հասցեին:
Նրանք նաև հերքում են արդարադատության նախարարի և Քրեակատարողական ծառայության պնդումը, թե ներքնակներ են այրել: Մարդու իրավունքների պաշտպանի ներկայացուցիչներին փոխանցել են, որ այրվել է ընդամենը մեկ սրբիչ:
«Իսկ ո՞վ է ասում, որ բռնություն է կիրառվել»
«Իսկ ո՞վ է ասում, որ բռնություն է կիրառվել», - հայտարարում է արդարադատության նախարարը: Ծեծուջա՞րդ, թե՞ ֆիզիկական ուժի օրինական գործադրում է եղել. Սրբուհի Գալյանը վստահեցնում է, որ Նուբարաշենի բանտում ցմահների նկատմամբ երեկ տեղի ունեցածը պատասխանն էր նրանց բողոքի ակցիայի:
«Խնդիրների լուծումը բռնությա՞մբ է, թե՞ ոչ, ես ասում եմ՝ ոչ: Խնդիրներ ամեն օր կան, և լուծումները իհարկե բռնությամբ չեն», - նշում է նախարարը:
Ցմահ դատապարտյալները միջադեպից անմիջապես հետո տեղի ունեցածի մասին ահազանգել էին իրավապաշտպան Ժաննա Ալեքսանյանին: Պատմել, որ դաժան ծեծի են ենթարկվել. պատճառն էլ, թերևս, այն է, որ քրեական ենթամշակույթը գովաբանող ինչ-որ երգ էին երգել: Պաշտոնական հաղորդագրությունը, թե ամեն ինչ օրենքի սահմաններում է արվել, Ալեքսանյանը կեղծիք է որակում:
«Այսինքն, մարդիկ նաև իրավունք չունեն բարձրաձայնել իրենց այդ իրավունքների մասին, ամեն առիթով իրենց ասած ֆիզիկական ուժի գործադրման են անցնում, որի իրավունքի մասին էլ խոսում է նախարարը: Ի՞նչ իրավունք ունեն շարունակ բռնության ենթարկել դատապարտյալներին, և դա պնդում են», - «Ազատության» հետ զրույցում ասաց Ալեքսանյանը:
«Թող ծառայողական քննությունը պարզի»
Ի՞նչ է իրականում տեղի ունեցել Նուբարաշենի բանտում: Իրավապաշտպանն ասում է՝ թող ծառայողական քննությունը պարզի: Ինչի՞ց է նախարարը եզրակացրել, որ բանտի ղեկավարությունն օրենքով է գործել, եթե չկա ծառայողական քննություն:
«Մարդիկ փակված են բանտում, և նրանց խոսքը չի հնչում: Ինչո՞ւ պետք է ես վստահեմ նախարարին կամ նրանց տարածած հաղորդագրությանը, երբ որ չկա էն կողմը, որը կարող է խոսել, կամ թեկուզ ծառայողական քննությունը եթե, ասենք, լիներ օբյեկտիվ, որը անհնար եմ համարում, և այդ մարդկանց տեսակետը մենք իմանայինք՝ ինչ է այնտեղ տեղի ունեցել», - ընդգծեց Ժաննա Ալեքսանյանը:
Արդարադատության նախարարությունը, սակայն, պնդում է՝ իրենց համար ամեն ինչ պարզ է, ծառայողական քննություն անցկացնելու կարիք չեն տեսնում:
«Եթե խոսքը նրա մասին է, որ Քրեակատարողականի ծառայողները չպետք է կարողանան իրենց լիազորությունները իրականացնել, ապա ոչինչ չունեմ ասելու, դա նորմալ չէ», - շեշտում է Սրբուհի Գալյանը:
Իրավապաշտպանի խոսքով՝ սա ցմահների առաջին ընդվզումն է նոր նախարարի ու Քրեակատարողական ծառայության նոր պետի նշանակումից հետո, և այս ղեկավարներն անելիք ունեն բանտերում, որտեղից պարբերաբար մարդու իրավունքների խախտումների մասին բողոքներ են ստանում:
«Իսկ նախարարը նշանակումից ի վեր հետաքրքրվե՞լ է՝ լողանալու իրավունք ունե՞ն դատապարտյալները, թե՞ չէ, կա՞ն էդպիսի պայմաններ, որ դատապարտյալները, օրինակ, լողանան, չկա: Ի՞նչ սնունդ են տալիս, ի՞նչ են ուտում դատապարտյալները, շատ վատ բառով կարելի է բնութագրել՝ լափ», - ասում է Ժաննա Ալեքսանյանը:
Նուբարաշենի բանտում տեղի ունեցածի վերաբերյալ հավաքած տեղեկություններն ամփոփելուց հետո Մարդու իրավունքների պաշտպանը պարզաբանումներ կպահանջի պետական կառույցներից:
