ԱՄՆ նախագահ Դոնալդ Թրամփը յոթ դաշնային գործակալությունները կրճատելու հրամանագիր է ստորագրել։
Կրճատման ենթակա գործակալությունների թվում նաև ԱՄՆ գլոբալ լրատվամիջոցների գործակալությունն է (USAGM), որը վերահսկում է «Ազատություն ռադիոկայան» և «Ամերիկայի ձայն» լրատվամիջոցները։
Հրամանագիրը ստորագրվել է մարտի 14-ի ուշ երեկոյան և վերաբերում է նաև անօթևանների, աշխատանքային վեճերի և համայնքների զարգացման հարցերով զբաղվող գործակալություններին։
Հրամանի հրապարակման օրվանից 7 օրվա ընթացքում գործակալության ղեկավարները պետք է հրամանի կատարման մասին հաշվետվություն ներկայացնեն Կառավարման և բյուջեի գրասենյակի տնօրենին։
«Ազատություն» ռադիոկայանը դեռ չի մեկնաբանել նախագահ Թրամփի այս հրամանը:
USAGM-ն անկախ պետական գործակալություն է, որը վերահսկում է մոտ 50 լեզուներով լուրերի և տեղեկատվության հեռարձակումը։ 2025-ի համար USAGM-ին անհրաժեշտ բյուջեն կազմել է 950 միլիոն դոլար, այդ թվում՝ «Ազատություն» ռադիոկայանը, «Ամերիկայի ձայնը», «Ազատ Ասիա» ռադիոն, «Կուբայի հեռարձակման գրասենյակը» (Radio Marti), «Մերձավոր Արևելքի հեռարձակման ցանցերը» (MBN) և «Բաց տեխնոլոգիաների հիմնադրամը» ֆինանսավորելու համար։
Թրամփը, որ հունվարին պաշտոնը ստանձնելուց ի վեր մի շարք քայլեր է ձեռնարկել կրճատելու կառավարության ծախսերն, իր պաշտոնավարման առաջին ժամկետի ընթացքում, ընդհարում էր ունեցել USAGM-ի հետ խմբագրական անկախության և ծրագրերի ուղղվածության շուրջ:
Նույն պնդումները նա արել է Սպիտակ տուն վերադառնալուց հետո, մինչդեռ հեռարձակողների աջակիցները կարծում են, որ այս լրատվամիջոցները կարևոր զենք են ԱՄՆ դիվանագիտության համար:
